ქართული ოცნების აღმასრულებელი მდივნის, ირაკლი კობახიძის განცხადებით, თუ 31 ოქტომბრის საპარლამენტო არჩევნების შემსწავლელი დროებითი საგამოძიებო კომისია ქართული ოცნების სასარგებლოდ თუნდაც 1%-იან გადახრას დააფიქსირებს, ის პოლიტიკურ თანამდებობას დატოვებს და ჩამოშორდება პოლიტიკურ საქმიანობას.

"თუ დაფიქსირდება თუნდაც 1%-იანი გადახრა, ქართული ოცნების სასარგებლოდ და ჩვენ დარწმუნებული ვართ, რომ გადახრა 0,1%-ც კი არ იქნება, ქართული ოცნება გამოაცხადებს რიგგარეშე არჩევნებს. გარდა ამისა, როგორც ქართული ოცნების საარჩევნო შტაბის ხელმძღვანელი, სრული პასუხისმგებლობით ვაცხადებ, რომ ასეთ შემთხვევაში დავტოვებ ყველა პოლიტიკურ თანამდებობას და სრულად ჩამოვშორდები პოლიტიკურ საქმიანობას", — განაცხადა კობახიძემ.

კობახიძის თქმით, პირველი შეკრებისთანავე საპარლამენტო უმრავლესობა 2020 წლის საპარლამენტო არჩევნების შემსწავლელი დროებითი კომისიის შექმნას დააინიცირებს.