სომხეთის სამოციქულო ეკლესიის კათოლიკოსი გარეგინ მეორე პრემიერმინისტრ ნიკოლ ფაშინიანს გადადგომისკენ მოუწოდებს. კათოლიკოსის განცხადებაში ნათქვამია, რომ გამოწვევების, დაბალი ნდობისა და დაძაბულობის ზრდის ფონზე ფაშინიანმა თანამდებობა უნდა დატოვოს, რათა შეტაკებები და ტრაგიკული შედეგები თავიდან იქნას აცილებული.

სომხეთის ეკლესიის მღვდელმთავარი ასევე მოუწოდებს პარლამენტს, რომ ყური დაუგდონ საზოგადოების მოთხოვნებს და პოლიტიკურ პარტიებთან შეთანხმებით ახალი პრემიერი და დროებით მთავრობა ჩამოაყალიბონ.

"მხოლოდ მთავრობას, რომელიც პროფესიონალებისგან შედგება და აქვს ნდობა, შეუძლია დაარეგულიროს ხალხის წინაშე არსებული პრობლემები, აღადგინოს ეროვნული სოლიდარობა, ერთიანობა და ჩაატაროს რიგგარეშე საპარლამენტო არჩევნები, რაც გარდაუვალი აუცილებლობაა", — ნათქვამია კათოლიკოსის მიმართვაში.

27 სექტემბერს განახლებული საბრძოლო შეტაკებები მთიან ყარაბაღში სომხეთსა და აზერბაიჯანს შორის 9 ნოემბერს მიღწეული შეთანხმების შედეგად დასრულდა, რომლის შუამავალი რუსეთი იყო.

ყარაბაღში ომის დასრულების შესახებ შეთანხმება სომხეთში კაპიტულაციად აღიქვეს, რასაც მოსახლეობის პროტესტი მოჰყვა. დემონსტრანტები მთავრობის სახლში და პარლამენტში შეიჭრნენ. გარდა ამისა, ზოგიერთი პარლამენტის სპიკერს დაესხა თავს და ფიზიკურად გაუსწორდა. ერევნისგან განსხვავებით, ბაქოში შეთანხმებას სიხარულით შეხვდნენ.

სამმხრივ დოკუმენტს ხელი სომხეთის პრემიერმინისტრმა, ნიკოლ ფაშინიანმა, აზერბაიჯანის პრეზიდენტმა, ილჰამ ალიევმა და რუსეთის პრეზიდენტმა ვლადიმერ პუტინმა მოაწერეს. შეთანხმების მიხედვით, სომხურმა მხარე, აზერბაიჯანს კონფლიქტის ზონაში რამდენიმე ტერიტორია გადსეცა და კონფლიქტის ხაზის გასწვრივ კი რუსი სამშვიდობოები განლაგდნენ. დროდადრო კი რეგიონში დევნილები დაბრუნდებიან.

ამავე თემაზე: