დავიწყოთ მარტივი ჭეშმარიტებით — ადამიანების ერთი ნაწილი ახალი წლის სამზადისით ისეთი აღტაცებული არაა, როგორც მეორე, დანარჩენი ნაწილი და ეს დამოკიდებულება და სადღესასწაულო განწყობის არქონა 2020 წელს ასმაგად გამართლებულია.

თუმცა, თუ ამჯერადაც ისე მოხდა, რომ სიქრეთ სანტას თამაშში ჩაგითრიეს და ახლა თანამშრომლისთვის ან მეგობრისთვის საჩუქარი გაქვს საპოვნელი, ყურებს ნუ ჩამოყრი, შენს საჩუქარზე ჩვენ ვიზრუნეთ და ეს საუცხოო სასაჩუქრე იდეები შეგიკრიბეთ.

1. საჩუქარი სომელიესთვის

ან უბრალოდ მეგობრისთვის, რომელთან ერთადაც ღვინოს სიამოვნებით სვამ.

ნაკრები 5 ნივთისგან შედგება. აქ შეხვდებით რამდენიმე სახის სახსნელს, მრავალფუნქციურ დანას, მოწყობილობას — რომელიც დასხმისას ღვინის დაღვრის შანსს 0%-მდე დაიყვანს და იგივე დანიშნულების ბოთლის "ბეჭედს". საჩუქარის ყუთს ღვინის ბოთლის ფორმა აქვს და მაგნიტით იკეტება.

ყიდვამდე წარმოიდგინეთ მეგობრის ან თანამშრომლის სახე, როცა ერთი შეხედვით იფიქრებს, რომ მისი საჩუქარი უბრალოდ ღვინის ბოთლია...

ფასი: $16,98

2. სუკულენტების ფორმის სანთლები

იდეალური საჩუქარი მეგობრისთვის, რომელსაც აბაზანაში სანთლების შუქზე ნებივრობა უყვარს.

ფასი: $14,88

3. ბურიტო - პლედი

წარმოიდგინეთ, სამუშაო დღის დასრულება და მაგიდიდან ტახტზე გადაჯდომის მომენტი (სახლიდან მომუშავეებს არ გაგიჭირდებათ).

და ამის შემდეგ წარმოიდგინეთ თბილი, ღუნღულა პლედი, რომელშიც ბურიტოსავით გაეხვევით და საყვარელ სერიალს ჩართავ.

მგონი, ეს ჯობს თავად იყიდო.

ფასი: $19,99

4. UNO ჰარი პოტერის თემატიკით

ჰარი პოტერზე უგონოდ შეყვარებულ მეგობარს ამაზე უკეთესს რას აჩუქებ? მით უმეტეს, თუ ისევ შენთან ერთად უნდა ითამაშოს? კარტი უნოს ორიგინალისგან იმით განსხვავდება, რომ აქ ჰარი პოტერის პერსონაჟების სურათებს ვხვდებით. წესები იგივეა, თუმცა შეცვლილი პერსონაჟების გამო, კარტს თან ინსტრუქცია მოჰყვება.

ფასი: $12,90

5. ლოხ-ნესის ურჩხულის საჩაიე

ლოხ-ნესის ურჩხული საზარლად ჟღერს, მაგრამ ამ ბაძაძა ცისფერ წყლის არსებაზე საყვარელი ვინ შეიძლება იყოს ჩაის სმის დროს პარტნიორად? ამ საჩუქრის შერჩევის შემთხვევაში, მის ახალ მფლობელს ყოველი გემრიელი ჩაის დალევის დროს შენ გაახსენდები.

ჩაის დასაყენებელი 100%-ით უსაფრთხო და შემოწმებული სილიკონისგანაა დამზადებული და ადუღებულ წყალს უძლებს.

ფასი: $14,90

6. სანათი, 3D ილუზიით

ეს სანათები სხვადასხვა დიზაინითა და ფერებითაა წარმოდგენილი. ვარსკვლავური ომები, რკინის კაცი, მარიხუანის სიმბოლო, სუპერმენი, ჰოკეი... მოკლედ, რაც გინდა, სულო და გულო. ირთვება როგორც ელემენტებით, ისე USB კაბელით და ყოველ ღამით საძინებელში მყუდრო და ჯადოსნურ გარემოს ქმნის..

ფასი: $17,55

7. წინდები საკუთარი თავისთვის

ეს ამ სიაში ისეთივე შემოპარული საჩუქარია, როგორც Among Us-ის თვითმარქვია. თბილი და ღუნღულა წინდებით უთქმელად შეახსენებ საყვარელ ადამიანს, რომ ღვინის დამატების დროა!

ფასი: $9,95

8. სამზარეულოს ღრუბელის საწოლი

ამაზე საყვარელი საჩუქარი არ ვიცით, თუ არსებობს. თქვენი აზრით, სამზარეულოს ღრუბელს არ სჭირდება დასვენება და ღირსეული ძილი მას შემდეგ, რაც მთელი ოჯახის მიერ გამოყენებული ჭურჭლის გაკრიალებას თავის თავზე აიღებს? ჩვენ გვჯერა, რომ ამ საწოლით თვით სპანჯ ბობიც კმაყოფილი დარჩებოდა!

ფასი: $14,80

9. თმის გასაფერადებლები

თუ შენმა მეგობარმა თვითიზოლაციაში ცოტა მოიწყინა, ამ საჩუქრით მის გახალისებას ნამდვილად შეძლებ. უფრო მეტიც, მის ცხოვრებას გააფერადებ, თავად მას კი ტყის ფერიად გადააქცევ!

როგორც მის აღწერაში ვკითხულობთ, 10 სხვადასხვა ფერის საღებავი თმას დროებით ფერს შეუცვლის, მოშორების შემდეგ კი მას კვლავ ნაზსა და ფაფუკს დატოვებს.

ფასი: $19,99