სატანას და 2020-ს ახალ რეკლამაში ერთმანეთი უყვარდებათ
![](http://ross.on.ge/2020/12/03/Match-Made-in-Hell_5fc8fc8755a59.jpg)
ფოტო: Maximum Effort
— საიდან ხარ?
— ჯოჯოხეთიდან, შენ?
— მეც.
ეს პატარა დიალოგი შეიძლება შესანიშნავი ურთიერთობის დასაწყისი აღმოჩნდეს, განსაკუთრებით მაშინ, თუ ერთმანეთს ონლაინ გაცნობის აპლიკაციაში "და-match-ებული" სატანა და 2020 წელი შეხვდებიან.
ყველაფერი 11 თვის წინ, 2020 წლის 2 იანვარს იწყება, როცა, ჯოჯოხეთში მყოფი ეშმაკი იგებს, რომ მისი მეორე ნახევარი სადღაც, დედამიწაზე არსებობს, სახელად 2020.
ეშმაკი 2020-ის გამო დედამიწაზე ჩამოდის, ისინი ერთმანეთს პარკში წვიმიან ამინდში ხვდებიან. მეტი რომანტიკისთვის, პაემანს თან ახლავს პატარა ციყვისთვის ფატალური ელვაც.
ასე იწყება სატანისა და 2020-ის დაუვიწყარი სიყვარულის ისტორია — პიკნიკები დაცარიელებულ მოედანზე; იოგა დაკეტილ სავარჯიშო დარბაზში; კინოთეატრები, რომლებიც მხოლოდ მათთვისაა ღია; ტუალეტებიდან მოპარული ქაღალდები; მეტეორების წვიმა... ერთ სცენაში 2020 სატანას ეკლესიისკენაც კი მიათრევს.
ფოტო: Maximum Effort
"არ მინდა, რომ ეს წელი დასრულდეს", — ამბობს სატანა დანანებით რეკლამის ბოლოს, მეტეორების წვიმის ფონზე. "ვის ენდომებოდა?" — პასუხობს 2020.
უჩვეულო წყვილი მოგვიანებით ინტერვიუსაც აძლევს და საკუთარ ურთიერთობაზე უფრო მეტს გვიყვება.
აპლიკაცია Match-სთვის გადაღებულ რეკლამას წლის ერთ-ერთი საუკეთესო შეიძლება ვუწოდოთ და მის უკან ორი ვარსკვლავი დგას. ვიდეო რაიან რეინოლდსის კომპანიას, Maximum Effort-ს ეკუთვნის და მასში ტეილორ სვიფტის ცნობილი ჰიტის, Love Story-ის ხელმეორედ ჩაწერილ ვერსიას პირველად ვისმენთ. სიმღერის ტექსტი "Romeo, take me somewhere we can be alone / რომეო, წამიყვანე სადმე, სადაც მარტონი ვიქნებით" 2020-ის შინაარსთან იდეალურ თანხვედრაშია.
"აქციე 2021 შენს წლად" — ვკითხულობთ ფინალურ სლოგანს. ალბათ დაგვეთანხმებით, რომ არ აქვს მნიშვნელობა მარტო ხარ, შეყვარებული, დაქორწინებული თუ დისტოპიური რეალობით გადაღლილი, ეს სახალისო რეკლამა აუცილებლად გაგიუმჯობესებდა განწყობას.
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
გადახედვა
-
გადახედვა
-
გადახედვა
-
-
გადახედვა
-
გადახედვა
-
-
-
გადახედვა
-
-
კომენტარები