პარლამენტთან აქტივისტებმა ბუშტები გაუშვეს და რკინის ჯებირზე წარწერები გააკეთეს. ამ ფორმით აქტივისტები ბათუმში გამართულ აქციაზე მომხდარს აპროტესტებენ. ამავე თემაზე აქტივისტებმა შინაგან საქმეთა სამინისტროს შენობასთანაც გაუშვეს წითელი ბუშტები.

"მოვუწოდებ ხელისუფლებას, შეწყვიტეთ ასეთი უგუნური ქმედებები, თორემ არის ქართული ანდაზა — ბრიყვი მიუშვი ნებასა თვით შეეყრება სნებასა. ჩვენი ხელისუფლება ზუსტად ამ გზას ადგას — რამენაირად სნებას შეეყარონ. ეგ არის სისულელე, რომ ბუშტებს დასდევ. იმის მაგივრად იჯდე და ფიქრობდე პოლიტიკურ კრიზისიდან, ეკონომიკური კრიზისიდან კორონას კრიზისიდან, დემოგრაფიული კრიზისიდან, ეკოლოგიური კრიზისიდან და საერთოდ ამ კრიზსებიდან გამოსვლის გზას ეძებდე, აკეთებ მსგავს სისულელეებს", — განაცხადა პარლამენტთან მიმდინარე აქციაზე თავისუფალი საქართველოს წევრმა, გოგი წულაიამ.

2 დეკემბერს პოლიციამ აჭარის ავტონომიური რესპუბლიკის მთავრობის სახლთან აქციის მონაწილეებს ბუშტები დაუხეთქა, რომლებზეც ეწერა, რომ თორნიკე რიჟვაძე მონაა. ამ აქცია-პერფორმანსზე სამართალდამცავებმა დაუმორჩილებლობის ბრალდებით 2 პირი დააკავეს.