ეკონომიკის მინისტრ ნათია თურნავას განცხადებით, ბუნებრივ აირზე ტარიფი არ გადაიხედება. რაც შეეხება თბილისი ენერჯის მიერ კომერციული მომხმარებლებისთვის გაზის გაძვირებაზე ამბობს, რომ ამაზე კომპანიას დაელაპარაკებიან. თურნავას თქმით, მოსახლეობის მიმართულებით ბუნებრივი აირის ტარიფის გაძვირებას არ ელოდებიან, თუმცა ამბობს, რომ გასარკვევია, რამდენად ეყრდნობა რეალურ გარემოებებს თბილისი ენერჯის გადაწყვეტილება.

"კომერციულ ფასები, როგორ გაყიდის თბილისი ენერჯი [გაზს] ეს არ არის რეგულირებადი ტარიფი, ეს მათი ბიზნესის ნაწილია, თუმცა ჩვენ აუცილებლად გვექნება მათთან კომუნიკაცია ამ დაანონსებულ ცვლილებასთან დაკავშირებით. აუცილებლად შევხვდებით, დაველაპარაკებით, გავერკვევით რამდენად დასაბუთებულია ეს მათი გეგმები და რამდენად ეყრდნობა რეალურ გარემოებებს, რამდენად ამოწურა კომპანიამ ყველა ის შიდა რესურსი და რამდენად აუცილებელი არის ახლა, საკმაოდ რთულ ვითარებაში კომერციულ გაზის ფასების გადახედვა", — განაცხადა თურნავამ.

შპს თბილისი ენერჯი 2021 წლის 3 იანვრიდან კომერციული მომხმარებლებისთვის, პურის საწარმოების გარდა, გაზის ტარიფს აძვირებს. კომპანიაში აცხადებენ, რომ არასაყოფაცხოვრებო აბონენტებისთვის ბუნებრივი აირის ფასი ერთ კუბურ მეტრზე 1 ლარითა და 10 თეთრით განისაზღვრება, დამატებული ღირებულების გადასახადის ჩათვლით.

კომპანიაში, აღნიშნავენ, რომ ბუნებრივი აირის ფასი საყოფაცხოვრებო მომხმარებლებისთვის არ ძვირდება, რომელიც 1 კუბურ მეტრზე 0,461374 ლარს შეადგენს და დადგენილია სემეკის მიერ.