საქართველოს პრემიერმინისტრის, გიორგი გახარიას განცხადებით, NATO-ს მყარი მხარდაჭერა ღია კარის პოლიტიკის გაგრძელების მიმართ, ჩვენი ქვეყნისთვის უაღრესად მნიშვნელოვანია. ასე ეხმაურება გახარია NATO-ს წევრი ქვეყნების საგარეო საქმეთა მინისტრების შეხვედრას, რომელიც 1-2 დეკემბერს გაიმართა.

"მინდა მადლობა გადავუხადო თითოეული ჩვენი მეგობარი ქვეყნის საგარეო საქმეთა მინისტრებს, რომლებმაც მხარი დაუჭირეს, როგორც საქართველოს ტერიტორიულ მთლიანობას, ასევე, საქართველოს ჩრდილო ატლანტიკურ ალიანსში ინტეგრაციის შემდგომ გაღრმავებას და მათ პრაქტიკული გეგმებით და ნაბიჯებით მხარი დაუჭირეს საქართველოს თავდაცვისუნარიანობის გაძლიერებას. ეს ჩვენთვის უკიდურესად არის მნიშვნელოვანი, რამეთუ კიდევ ერთი დასტურია იმისა, რომ საქართველოს ევროატლანტიკური ინტეგრაცია არის სწორად აღქმული ჩვენი პარტნიორი ქვეყნებისთვის და მათგან აქვს სრული მხარდაჭერა", — განაცხადა გახარიამ.

NATO-ს წევრი ქვეყნების საგარეო საქმეთა მინისტრების ვიდეოკონფერენცია 1-2 დეკემბერს გაიმართა.

ნატოს გენერალურის მდივნის, იენს სტოლტენბერგის განცხადებით, შავი ზღვის რეგიონს ნატოსა და ნატოს ყველა მოკავშირისთვის სტრატეგიული მნიშვნელობა აქვს. მისი თქმით, ისინი მჭიდროდ თანამშრომლობენ პარტნიორ საქართველოსა და უკრაინასთან. ნატოს 3 წევრი ქვეყანა — თურქეთი, ბულგარეთი და რუმინეთი შავი ზღვის სანაპირო ქვეყნებია. ასე რომ, სტოლტენბერგის თქმით, ნატო შავი ზღვის რეგიონში ძალებს ინარჩუნებს.

"როგორც პარტნიორები, მჭიდროდ ვთანამშრომლობთ უკრაინასა და საქართველოსთან, რადგან ვხედავთ, რომ ყირიმის უკანონო ანექსიითა და საქართველოს ნაწილებში რუსი სამხედროების განთავსებით, რუსეთი ამ ქვეყნების სუვერენიტეტისა და ტერიტორიული მთლიანობის დარღვევას აგრძელებს", — აცხადებს სტოლტენბერგი.