NATO-ს გენერალური მდივნის, იენს სტოლტენბერგის განცხადებით, 2008 წლის ბუქარესტის სამიტზე მიღებული გადაწყვეტილება საქართველოს NATO-ში გაწევრიანების თაობაზე ისევ ძალაშია. ასე უპასუხა მან დღეს NATO-ს საგარეო საქმეთა მინისტრების შეხვედრის წინ გამართულ პრესკონფერენციაზე ფორმულას ჟურნალისტის კითხვას, როგორ ხედავდა თანამშრომლობას საქართველოსთან და რა ეტაპზეა ქვეყანა გაწევრიანების სამოქმედო გეგმის მიღების პროცესში.

"NATO-ს მიზანი 2030 წლისთვის არის NATO-ს, როგორც პოლიტიკური ალიანსის გაძლიერება და, ასევე, ისეთ პარტნიორებთან მუშაობის გაძლიერება, როგორიც საქართველოა. ის ნამდვილად ღირებული პარტნიორია ჩვენთვის და საქართველოსა და NATO-ს შორის პარტნიორობა ჩვენ ყველას უსაფრთხოებაზე მოქმედებს. მე მტკიცედ მწამს, რომ ეს თანამშრომლობა არ მხოლოდ საქართველოსთვის, არამედ NATO-სთვისაც კარგია.

განსაკუთრებით კი იმიტომ, რომ საქართველოს შეაქვს თავისი წვლილი NATO-ს მისიებსა და ოპერაციებში, განსაკუთრებით ავღანეთში სადაც საქართველო მონაწილეობას იღებს შეიარაღებული ძალებით, ტექნიკით, უკვე ძალიან ბევრი წელია.

ჩვენ ვმუშაობთ მჭიდროდ საქართველოსთან შავ ზღვაზეც. ჩვენ ვაწვდით მას როგორც პოლიტიკურ, ასევე პრაქტიკულ დახმარებას. ჩვენ გავაუმჯობესეთ ჩვენი მხარდაჭერა იმითაც, რომ უფრო მეტი რამ გაკეთდა საზღვაო სფეროში, მათ შორის, სანაპირო დაცვის ტრენინგებიც. მეტად ვიზიარებთ საჰაერო მიმოსვლის სარადარო მონაცემებს და ერთობლივად ვმუშაობთ ჰიბრიდული საფრთხეების მოსაგვარებლად, ასევე ვატარებთ ერთობლივ სწავლებას შავი ზღვის რეგიონში.

არ დავიწყებ სპეკულაციებს იმასთან დაკავშირებით, როდის შეიძლება მიიღოს საქართველომ წევრობა, მაგრამ შემიძლია ვთქვა, რომ 2008 წლის ბუქარესტის სამიტზე მიღებული გადაწყვეტილება კვლავ ძალაშია. მე მტკიცედ მწამს, რომ საქართველოსთვის საუკეთესო გზა NATO-სთან დაახლოვებისთვის გადის რეფორმების გატარებაზე, უსაფრთხოებისა და თავდაცვითი ინსტიტუტების მოდერნიზებაზე, NATO-ს მოკავშირეობასა და მის მხარდაჭერაზე. ჩვენ ასევე გვაქვს გაზრდილი წარმომადგენლობითობა ქვეყანაში, მაგალითად NATO-ს სასწავლო ცენტრი თბილისში", — განაცხადა სტოლტენბერგმა.

2008 წლის 3 აპრილს, ბუქარესტის სამიტზე ალიანსმა მიიღო გადაწყვეტილება, რომ საქართველო გახდება ნატოს წევრი ქვეყანა, რაც ნიშნავს მეკავშირეების მიერ აღებულ ღია ვალდებულებას.