ჟურნალისტმა ირინა ყურუამ ტვ 25 დატოვა. ყურუა საინფორმაციო სამსახურის უფროსი და გადაცემა დიალოგის წამყვანი იყო. 25-ე არხის უკვე ყოფილმა თანამშრომელმა On.ge-სთან ტელევიზიიდან წამოსვლის მიზეზებზე ისაუბრა. მისი თქმით, მენეჯმენტთან უთანხმოება ადამიანური რესურსის შემცირების გადაწყვეტილებამ გამოიწვია:

"მფლობელი და დირექტორი ამბობენ, რომ ბიუჯეტი ისეთი მწირი აქვს ტელევიზიას, რომ საინფორმაციოს ასეთი მასშტაბით ვერ შეინახავენ და ეს მასშტაბი არის სულ რაღაც ათიოდე ჟურნალისტი. ზოგადად, როდესაც რესურსი გაკლდება, ცხადია, ვერ შეინარჩუნებ ხარისხს. ძირითადად ეს იყო ჩვენი აზრთა სხვადასხვაობის მიზეზი და მცირე კონფლიქტის მიზეზი, რის გამოც წამოვედი ტელევიზიიდან."

ირინა ყურუას თქმით, ტელევიზია ვალდებულია, რომ დაუყოვნებლივ აღასრულოს სასამართლოს ძალით აღდგენილი თანამშრომლების ფინანსური დავალიანება, რაც დაახლოებით 40 ათასი ლარია. მისივე თქმით, ეს დამატებითი არგუმენტია ადმინისტრაციისთვის, რომ მისი გადაწყვეტილება გაამართლოს. ამასთან 5 კაციანი გუნდის პირობებში მუშაობა ყურუასთვის მიუღებელია:

"ფინანსური პრობლემები ტელევიზიას ჰქონდა და ეს არ არის ახალი ამბავი. უცებ რადიკალური გადაწყვეტილების წინაშე როცა გაყენებენ, თითქოს ეს სიახლეა, მე ვფიქრობ, რომ მენეჯმენტს თანმიმდევრული პოლიტიკა უნდა გაეტარებინა, რომ ასეთი რეალობა ტელევიზიის წინაშე არ დამდგარიყო. ზოგადად, არ მგონია სხვა მიზეზი იყოს იმიტომ, რომ პერსონალურად მფლობელიც და დირექტორიც მთხოვდნენ, რომ დავრჩენილიყავი, მეუბნებოდნენ, რომ ტელევიზიისთვის ეს იქნებოდა ძალიან ცუდი შედეგის მომტანი, მაგრამ მათ არ შეეძლოთ და არ უნდოდათ, მათ მიერ შემოთავაზებული ფორმატის შეცვლა და ისინი ამბობდნენ, რომ ბიუჯეტი არ აძლევთ სხვაგვარად მუშაობის საშუალებას. ის, რომ ჩვენ ამდენი ხანი გამართულად ვმუშაობდით, ეს შესაძლებელია, მათი ვარაუდით, 5 კაციანი გუნდის პირობებში. ჩემთვის ეს აბსოლუტურად მიუღებელია."

"სხვა შეფარული მიზეზები არ დამინახავს, თორემ, ცხადია პირველ რიგში ამაზე გავაკეთებდი აპელირებას და არა ბიუჯეტზე."- ამატებს ყურუა.