ისნის საოლქო კომისიის თავმჯდომარისთვის ქრთამის მიცემისა და მუქარის ბრალდებით დაკავებულების ადვოკატებს მიაჩნიათ, რომ სასამართლო ცდილობს, საქმე მკვლელობასთან დააკავშიროს. კერძოდ, ისინი აპროტესტებენ საქალაქო სასამართლოს გამოქვეყნებულ განცხადებას, რომელშიც ნათქვამია, რომ თავმჯდომარის "გარდაცვალების საქმეზე" ბრალდებულ პირებს პატიმრობა შეეფარდათ.

დაკავებული აკაკი ხუსკივაძისა და აკაკი კობალაძის ადვოკატები განმარტავენ, რომ ეს სიტყვები ინტერპრეტაციის საშუალებას ტოვებს და არასწორია, რადგან მათი დაცვის ქვეშ მყოფებს ბრალი ქრთამის მიცემის, ჯგუფურად ჩადენილი იძულებისა და მუქარის, ასევე, საბრძოლო მასალის მართლსაწინააღმდეგო შეძენისა და შენახვის საქმეზე წარედგინათ.

ადვოკატი, შოთა თუთბერიძე აცხადებს, რომ სასამართლოს უკვე ჩამოყალიბებული პოზიცია აქვს ამ საქმეზე და პროკურატრუის ვერსიას იზიარებს.

"ეს არის ტრაგიკული შემთხვევა, როცა ამგვარ სისხლის სამართლის საქმეზე სასამართლო წინასწარი პოზიციების გამოხატვა უწევს, მეორე ნაწილი გახლავთ ის, რომ სასამართლოს სისტემა და მთლიანად ყველა შტო ჩართულია იმაში, რომ საზოგადოების აზრი დაკავებულების წინააღმდეგ ფორმირდეს და საქმე მკვლელობასთან დაკავშირდეს", — აღნიშნავს ადვოკატი.

ხუსკივაძესა და კობალაძეს პატიმრობა 9 ნოემბერს შეეფარდათ. პროკურატურის ვერსიით, 6 ნოემბერს ბრალდებულები ნაციონალური მოძრაობის სახელით შეხვდენენ თედო გობეჯიშვილს და 50 000 აშშ დოლარის სანაცვლოდ თანამდებობის დემონსტრაციულად დატოვება შესთავაზეს. ასევე, უთხრეს მას, რომ არჩევნების გაყალბების თაობაზე მედიასთან განცხადება გაკეთებინა.

მათ დაკავებას წინ უძღოდა ქართული ოცნების საგანგებო ბრიფინგი, სადაც პარტიის წარმომადგენლებმა ენმ გარდაცვლილ გობეჯიშვილზე მუქარასა და ზეწოლაში დაადანაშაულეს.

ნაციონალური მოძრაობის ლიდერმა, ხატია დეკანოიძემ პასუხად განაცხადა, რომ ქართული ოცნება ადამიანის სიცოცხლით ვაჭრობს და პოლიტიკური მანიპულაციებისთვის იყენებს, რაც ამორალურია. ბრიფინგიდან დეკანოიძემ მმართველი გუნდის წევრებსა და იდეოლოგებს მიმართა:

"რა გჭირთ ხალხნო, ნუთუ არ გაგჩნიათ ელემენტარული მორალი, ნუთუ არ გაგაჩნიათ ელემენტარული ადმიანობა, რომ დღეს ამ სიტუაციაში კვლავ ადამიანების სიცოცხლით არ ივაჭროთ და პოლიტიკურ მანიპულაციაზე არ ილაპარაკოთ. ნუთუ არ გაგაჩნიათ ელემენტარული შინაგანი შეგრძნება იმის, თუ რა დღეშია დღეს თუნდაც ამ ადამიანის ოჯახი. რას ყვებით საერთოდ, რა დაგმართნიათ?!" — განაცხადა მან ბრიფინგზე.

დეკანოიძემ აღნიშნა ისიც, რომ მომხდარზე აუცილებლად ჩატარდება ობიექტური გამოძიება, როცა ბიძინა ივანიშვილი და მისი გუნდი წავა ხელისუფლებიდან.

გაიგეთ მეტი: