დიდ ქალაქებში, თბილისში, ბათუმში, ქუთაისში, რუსთავში, გორში, ფოთში, ზუგდიდსა და თელავში კერძო და საჯარო საბავშვო ბაღები მუშაობას შეაჩერებენ. საკოორდინაციო საბჭოს გადაწყვეტილებით, შეზღუდვა 28 ნოემბრიდან 31 იანვრის ჩათვლით იქნება ძალაში.

ეს შეზღუდვა მოქმედებს სათხილამურო კურორტებზეც, ბაკურიანში, გუდაურში, გოდერძსა და მესტიაში.

გარდა ამისა, ხსენებულ ქალაქებსა და რეგიონებში სკოლები, პროფსასწავლებლები და უმაღლესი საგანმანათლებლო დაწესებულებები (გარდა სამედიცინო საგანმანათლებლო პროგრამებისა) სრულად გადადიან დისტანციურ რეჟიმზე.

საბჭომ 28 ნოემბრიდან 31 იანვრის პერიოდში არაერთი შეზღუდვა დააწესა. მათ შორის, გადაადგილებაზე, მუნიციპალურ და საქალაქთაშორისო ტრანსპორტზე, რესტორნებსა და ბაზრობებზე. 24 დეკემბრიდან 2 იანვრის პერიოდში ხდება შეზღუდვების ნაწილობრივი შემსუბუქება: კერძოდ, ქვეყნის მასშტაბით, იმუშავებენ სავაჭრო ცენტრები, ღია და დახურული ბაზრობები და აღდგება როგორც მუნიციპალური, ისე საქალაქთაშორისო ტრანსპორტის მუშაობა. 3 იანვრიდან 15 იანვრის პერიოდში აღდგება ყველა ის შეზღუდვა, რომელიც 24 დეკემბრამდე მოქმედებდა. ამ პერიოდში ცხადდება უქმე, დასვენების დღეები. ხოლო 16 იანვრიდან აღდგება მუნიციპალური და საქალაქთაშორისო ტრანსპორტის მუშაობა, სავაჭრო ობიექტებისა და ღია და დახურული ბაზრობების მუშაობა (გარდა შაბათ-კვირისა).

პრემიერმინისტრ გიორგი გახარიას თქმით, შეზღუდვების ახალი ორთვიანი გეგმა, რომელიც 28 ნოემბრიდან პირველ თებერვლამდე იქნება ძალაში ფართო დისკუსიების შედეგად მიიღეს და პროცესში ჩართული იყვნენ, ექიმები, ბიზნესისა და სამოქალაქო საზოგადოების წარმომადგენლები, საერთაშორისო ექსპერტები და მრჩევლები.

"ჩვენი მთავარი მიზანი არის, რომ ამ ორთვიანი შეზღუდვებით ეპიდემიის გავრცელების სისწრაფე და ყოველდღიური ინფიცირების რაოდენობა შევამციროთ, რამაც, თავის მხრივ, უნდა შეამციროს დაწოლა ჯანდაცვის სისტემაზე, რამაც, თავის მხრივ, ბუნებრივად უნდა შეამციროს ტრაგიკული სიკვდილიანობის მაჩვენებლის ზრდა. ეს არის ამ გეგმის ძირითადი მიზანი...

ყველა ეს შეზღუდვა იქნება დროებითი და საქართველოს მთქავრობის სპეციალური, მეოთხე ტალღის პროგრამა, როგორც ბიზნესის, ასევე მოქალაქეების სოციალური დახმარების, ითვალისწინებს ამ შეზღუდვებს და სისტემურ ეკონომიკურ კრიზისსაც", — განაცხადა მან.

გაიგეთ მეტი ახალ შეღუდვებზე:

26 ნოემბრის მონაცემებით, საქართველოში კორონავირუსის კიდევ 3 801 ახალი შემთხვევა გამოვლინდა. გარდაიცვალა 39 და გამოჯანმრთელდა 3 200 პაციენტი. პანდემიის დაწყების დღიდან ქვეყანაში სულ 118 690 შემთხვევა დადასტურდა, აქედან 98 781 ადამიანი გამოჯანმრთელდა, ხოლო 1 124 — გარდაიცვალა.

ეპიდემიოლოგები და სამთავრობო გუნდის წევრები ამბობდნენ, რომ ვირუსის პრევენციისთვის შეზღუდვები აუცილებელია, თუმცა სრული "ლოქდაუნი" ქვეყნის ეკონომიკას დააზარალებს, ამიტომ ეტაპობრივად, წერტილოვანი შეზღუდვები დაწესდება.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: