ჯანდაცვის მინისტრის მოადგილის, თამარ გაბუნიას განცხადებით, საველე ჰოსპიტლის გაკეთება არ იგეგმება, რადგან კოვიდსასტუმროების გამო ამის საჭიროება არაა. პირველ არხთან მინისტრის მოადგილემ ისაუბრა, რომ კოვიდსასტუმროები კარგად აწყობილი განვითარებული სისტემაა.

როგორც მან განმარტა, კოვიდსასტუმროში ამჟამად 4 500 ადამიანი რჩება და 5 000 ათასი საწოლი უკვე მობილიზებულია.

"ექიმების, ექთნებისა და სტუდენტების გუნდები ძალიან აქტიურად მუშაობენ. ისევე, როგორც ჰოსპიტლებში, კოვიდსასტუმროებშიც ჩვეულებრივ შესაძლებელია პაციენტისთვის დანიშნულების შესრულება, ინექციების წარმოება, მეთვალყურეობა და ჟანგბადის კონცენტრატორებიც კი დავამატეთ. რადგან თუ ვინმეს სჭირდება ჟანგბადით მხარდაჭერა, დროებით ჰქონდეთ ეს სასტუმროში. ამდენად, გარკვეულწილად, ეს ჩვენთვის არის საველე ჰოსპიტლის ანალოგი“, – განაცხადა თამარ გაბუნიამ.

23 ნოემბერს საქართველოში კორონავირუსის 3 958 ახალი შემთხვევა დადასტურდა, გამოჯანმრთელდა — 3 531, გარდაიცვალა — 36. სულ ქვეყანაში კორონავირუსის 108 ათასი შემთხვევაა უკვე გამოვლენილი, ხოლო გარდაცვლილთა რაოდენობამ 1 012-ს მიაღწია.

New York Times-ის მიერ გამოქვეყნებული ახალი მონაცემების თანახმად, ბოლო კვირის განმავლობაში, 100 ათას მოსახლეზე ინფიცირების მაჩვენებლით საქართველო კოვიდ-რუკაზე პირველ ადგილს იკავებს. მას შემდეგ ლუქსემბურგი, მონტენეგრო და სერბეთი მოსდევს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: