რუსთავში აფთიაქი იმპექსში მომხდარ სავარაუდო ქურდობასთან დაკავშირებით ინფორმაცია დღეს გავრცელდა.

ადგილობრივი გამოცემა ინფო რუსთავი წერს, რომ აფთიაქი 5-მა ქალმა გაძარცვა და ზარალი 1 000 ლარს აღწევს, რაც შსს-ში On.ge-ს არ დაუდასტურეს:

"ვრცელდება არასწორი ინფორმაცია, გაძარცვა არ ყოფილა, იყო ქურდობა დაახლოებით 10 დღის წინ, ხოლო აფთიაქმა შემოიტანა განცხადება ამის თაობაზე მხოლოდ გუშინ. ქურდობის ფაქტთან დაკავშირებით მიმდინარეობს გამოძიება სსკ-ის 177-ე მუხლით. ქურდობაში ფიგურირებს მხოლოდ ერთი ქალი და არასწორია ინფორმაცია, რომ აფთიაქი გაძარცვა რამდენიმე ქალმა. წაღებულია 1 ცალი შამპუნი და 1 ცალი კრემი, ნამდვილად არაა წაღებული ათასი ლარის პროდუქცია".

On.ge უახლოეს მომავალში შემოგთავაზებთ აფთიაქის მარკეტინგის ხელმძღვანელის კომენტარს.

განახლება:
როგორც იმპექსის მარკეტინგის ხელმძღვანელმა გვითხრა, ზარალი იმაზე მეტია, ვიდრე შსს ამბობს:
"ამჯერად მიმდინარეობს აღწერა, ერთი ცალი შამპუნი და 1 ცალი კრემი რომ დაკარგულიყო, გამოძიებას ვინ დაიწყებდა? ისედაც იკარგება ამდენი ნივთი ყოველდღე".