ბათუმში ერთ-ერთი საცხოვრებელი კორპუსის აივანზე ანტიოპოზიციური ბანერი გადმოკიდეს. ბანერზე ენმ-გაერთიანებული ოპოზიციის წევრების — მიხეილ სააკაშვილის, ლევან ვარშალომიძის, მურმან დუმბაძის სახეებია გამოსახული. TV პირველის ინფორმაციით, იმ კორპუსში ქართული ოცნების ბათუმის საარჩევნო შტაბის ხელმძღვანელი, გიორგი მანველიძე ცხოვრობს.

აღნიშნული ფაქტის გასაპროტესტებლად სამოქალაქო აქტივისტები მიმდებარე ტერიტორიაზე შეიკრიბნენ, რასაც ხმაური და დაძაბულობა მოჰყვა. აქციაზე მობილიზებული იყო პოლიციაც. იქ იმყოფებოდნენ ქართული ოცნების წარმომადგენლები და მხარდამჭერები.

ამასთან, დღეს ბათუმში პარტია ლელოს შტაბის წევრებს, ალექსანდრე მილორავასა და მიშა ქავთარაძეს ფიზიკურად გაუსწორდნენ. პარტიის ერთ-ერთი წევრის, საბა ბუაძის თქმით, თავდამსხმელები ქართული ოცნების უმაღლესი საბჭოს დეპუტატის ოჯახის წევრები იყვნენ.