ნაციონალური მოძრაობის ერთ-ერთი ლიდერი, ზაალ უდუმაშვილი აცხადებს, რომ დებატების შესახებ ირაკლი კობახიძის შეთავაზებაზე მათი პარტიის პოზიცია დღეს გახდება ცნობილი. უდუმაშვილის თქმით, ქართული ოცნების აღმასრულებელი მდივნის ეს შეთავაზება არის მწვავე პოლიტიკური კრიზისიდან გამოსავლის ძიების მცდელობა. ამის შესახებ მან რუსთავი 2-თან განაცხადა

"ახლა გაახსენდათ დებატები, როდესაც უმწვავეს კრიზისში შევიდნენ, ეს არის გამოსავლის ძებნის მცდელობა შექმნილი პოლიტიკური კრიზისიდან და არა რეალურად შეთავაზება ოპოზიციისთვის. ასე რომ ამაზე ჩვენ ოფიციალურ პასუხს განვაცხადებთ. დებატებში კი არ არის პრობლემა, არამედ პრობლემა არის ის, რისთვის იყენებს ხელისუფლება ამ დებატებს, რა სურს რომ ამით გვითხრას. ასე რომ ჩვენი პოზიცია დღეს გახდება ცნობილი", — აცხადებს უდუმაშვილი.

ირაკლი კობახიძემ ოპოზიციას სატელევიზიო დებატები შესთავაზა. მან რუსთავი 2-ის ეთერში განაცხადა, რომ მზადაა ისეთ ფორმატში მონაწილეობისთვის, სადაც ოპოზიციას დაუპირისპირდება მმართველი გუნდი, კონკრეტული განსახილველი თემები კი იქნება საარჩევნო დარღვევები, ხარვეზები და მანიპულაცია.