ევროპული საქართველოს ერთ-ერთი ლიდერი, დავით ბაქრაძე ამბობს, რომ საერთაშორისო პარტნიორების შეფასებები 31 ოქტომბრის საპარლამენტო არჩევნებთან დაკავშირებით უფრო და უფრო კრიტიკული გახდება. ასე ეხმაურება იგი საერთაშორისო რესპუბლიკური ინსტიტუტის IRI) ტექნიკური საარჩევნო შეფასების მისიის შუალედური ანგარიშის, რომლის მიხედვითაც არჩევნებმა საკონსტიტუციო ცვლილებებით დაწესებული ახალი სტანდარტები ვერ დააკმაყოფილა.

"ჩვენ პარტნიორებს ყოველდღიურად მეტი და მეტი ინფორმაცია აქვთ იმ დარღვევებზე, რომლებიც მოხდა წინასაარჩევნო პერიოდშიც და არჩევნების დღესაც. სწორედ მეტი და ობიექტური ინფორმაციის ასახვა არის ეს ანგარიში და მასში დაფიქსირებული უმძიმესი პრობლემები, თავისი უმძიმესი შეფასებით და დასკვნით, რომელიც მოვისმინეთ საერთაშორისო რესპუბლიკური ინსტიტუტისგან", — ამბობს ბაქრაძე.

ბაქრაძის განცხადებით, საერთაშორისო პარტნიორების თავდაპირველი შეფასებები ზედაპირული მონიტორინგს ეფუძნებოდა, რადგან კორონავირუსის გამო სადამკვირვებლო მისიები შეზღუდული რაოდენობით ჩამოვიდნენ საქართველოში.

"ეს არის უმძიმესი შეფასება და თვითონ დასკვნაც, შინაარსიც არის უმძიმესი და ნათლად მიანიშნებს იმ ცვლილებაზე, რომელიც ჩვენი პარტნიორების პოზიციაში ხდება დროთა განმავლობაში. საწყისი შეფასებების შემდეგ, რომელიც გაკეთდა მხოლოდ არჩევნების დღის ზედაპირული მონიტორინგით, იმ ძალიან შეზღუდული რაოდენობის მისიებით, რაც ჩამოვიდა აქ კოვიდპანდემიის გამო, პოზიციები იცვლება", — ამბობს ბაქრაძე.

მისი თქმით, რაც მეტ ინფორმაციას გაეცნობიან ქვეყნის საერთაშორისო პარტნიორები არჩევნების დროს დაფიქსირებულ დარღვევებზე, მით მეტად დამძიმდება მათი შეფასებები.

"ეს დარწმუნებული ვარ არ იქნება ბოლო ასეთი ტიპის დასკვნა და რაც უფრო მეტი დრო გავა, რაც უფრო მეტი ინფორმაცია გახდება ცნობილი ჩვენი პარტნიორებისათვის, მით უფრო კრიტიკული იქნება საერთაშორისო აზრი ივანიშვილის ხელისუფლების წინააღმდეგ და მით უფრო კარგად გამოჩნდება რამდენად დააზიანა საქართველოს ინტერესები ხელისუფლებამ არჩევნების გაყალბებით", — განაცხადა დავით ბაქრაძემ.

საერთაშორისო რესპუბლიკური ინსტიტუტის (IRI) ტექნიკური საარჩევნო შეფასების მისიის შუალედური ანგარიშის მიხედვით, მიუხედავად იმისა, რომ 31 ოქტომბრის საპარლამენტო არჩევნები მშვიდობიან გარემოში, ქვეყნის კანონმდებლობის დაცვით ჩატარდა, წინასაარჩევნო პერიოდსა და არჩევნების დღეს დაფიქსირებულმა დარღვევებმა, არჩევნების სრული პროცესის სანდოობაზე ნეგატიურად იმოქმედა.

გაიგეთ მეტი: