ეუთო/ოდირის სადამკვირვებლო მისიის დელეგატების განცხადებით, 31 ოქტომბრის საპარლამენტო არჩევნები საქართველოში კონკურენტუნარიანი იყო და არჩევანის ფუნდამენტური თავისუფლება დაცული იყო. საერთაშორისო სადამკვირვებლო მისიის წარმომადგენლების თქმით, პანდემიის პირობებში ეფექტურად იყო მოგვარებული ტექნიკური საკითხებიც. ევროსაბჭოს საპარლამენტო ასამბლეის (PACE) სადამკვირვებლო მისიის ხელმძღვანელის, ტინი კოქსის შეფასებით, ამ არჩევნებით საქართველომ აჩვენა რომ არჩევნების ჩატარება პანდემიის პირობებშიცაა შესაძლებელი. თუმცა, მისივე თქმით, წინასაარჩევნო გარემო არ იყო ჯანსაღი, რაც არჩევნების შედეგზე საბოლოოდ ნეგატიურ კვალს ტოვებს.

"წინასაარჩევნოდ ამდენი ფულის დახარჯვა ღარიბის ქვეყნისთვის არ არის კარგი სიგნალი საქართველოს მოქალაქეებისათვის. ამიტომ, მოვუწოდებთ პოლიტიკოსებსა და ახალ პარლამენტს ამ კუთხით ჩვენი რეკომენდაციები დაიცვან. მე დარწმუნებული ვარ, თქვენს ამას შეძლებთ, უბრალოდ ამისათვის პოლიტიკიური ნებაა საჭირო", — განაცხადა კოქსმა პრესკონფერენციაზე.

ეუთოს საპარლამენტო ასამბლეის მისიის ხელმძღვანელის, ელონა ჯებრეა ხოჯას განცხადებით, იყო ბრალდებები, რომ მმართველ პარტიასა და სახელმწიფოს შორის ზღვარი არ იყო გამიჯნული. საერთაშორისო სადამკვირვებლო მისიის წარმომადგენელმა ისიც აღნიშნა, რომ ბრალდებები ამომრჩევლებზე ზეწოლასაც შეეხებოდა.