ნაციონალური მოძრაობის ერთ-ერთი ლიდერის, სალომე სამადაშვილის განცხადებით, ექსპრეზიდენტის, მიხეილ სააკაშვილის საქართველოში ჩამოსვლას ოპოზიციაში ვერავინ შეეწინააღმდეგება. მისი თქმით, მათ ეს "ტექნოლოგიურად არ შეუძლიათ" და ამის პოლიტიკური თუ იურიდიული ბერკეტი არ გააჩნიათ. სამადაშვილის თქმით, ჩამოსვლა სააკაშვილის გადასაწყვეტია.

"ასევე, ვერ "ჩამოიყვანენ" სურვილის შემთხვევაში. ვერავინ ეტყვის, გარისკოს საკუთარი სიცოცხლე და თავისუფლება, დაბრუნდეს თუ არა. მისი გადასაწყვეტია. როგორც ყველა მძიმე გადაწყვეტილებაში, მარტოდმარტო რომ რჩები შენს თავთან, ისეთი გადაწყვეტილებაა. უკრაინის საზღვრის უკანონო გადაკვეთა ნამდვილად უპერსპექტივოდ მიმაჩნდა. ეს ნაბიჯი არ იყო პოპულარული საერთაშორისო ასპარეზზე და არ ვურჩევდი. თუმცა, უკრაინელი ხალხის სიყვარულის მოპოვებაში, მისმა ამ თავგანწირვამაც ითამაშა როლი. ამიტომ, მართალი თქვა, შემეშვითო, თავად მივხედავ ჩემს საქმესო", — წერს სამადაშვილი თავის ფეისბუქზე.

მისივე განცხადებით, სწორი იქნება თუ სააკაშვილი აღარ გაიმეორებს, რომ "ოპოზიციას თუ უნდა მითხრან, ჩამოვალო", რადგან ამას ვერვაინ ეტყვის და ვერც დაუშლის. სამადაშვილმა, ასევე, ექსპრეზიდენტის მიტინგებზე ჩართვაზე ისაუბრა და აღნიშნა, რომ თუ იმ სცენაზე რომელიმე გამომსვლელს, მიშას წინააღმდეგ სამართლებრივი დევნა კანონიერად მიაჩნია, "მაგით დაიწყოს გამოსვლა და ვნახავთ".

"ისე, ერთმანეთს ხომ ვიტანთ, მიუხედავად განსხვავებებისა, სააკაშვილის სკაიპით გამოსვლა რა პრობლემაა? მინიმუმ ისეთივე უფლება აქვს, როგორც ყველა სხვას, გამოვიდეს. ტრანსპარანტის დაჭერის უფლებაც, არ მეგონა, დასამტკიცებელი თუ გახდებოდა იმ ხალხისთვის, ვინც თავისუფლებისთვის იბრძვის. ასე რომ მშვიდად, მეგობრებო, ბიძინაზე ვკონცენტრირდეთ, აჯობებს", — განაცხადა სამადაშვილმა.

14 ნოემბერს ნაციონალური მოძრაობის წევრმა, გიორგი ბარამიძემ და ოპოზიციის სხვა წარომადგენლებმა ექს-პრეზიდენტ მიხეილ სააკაშვილის ჩამოსვლასთან და განცხადებებთან დაკავშირებით პირდაპირ ეთერში იკამათეს. როგორც TV პირველის ეთერში, ბარამიძემ თქვა, პარტნიორმა პოლიტიკოსმა მისი პარტიის თავმჯდომარეზე არ უნდა თქვა, თავი დაგვანებოსო. როგორც აღმოჩნდა, გიორგი ბარამიძეს არ მოეწონა პარტია მოქალაქეების ლიდერის, ალეკო ელისაშვილის განცხადება, რომ თუ სააკაშვილი ემსახურება უკრაინას, ემსახუროს, "ჩვენ თავი დაგვანებოს, ნუ ურევს ყველაფერს". ამის შესახებ მან ფეისბუქზე პოსტი გამოაქვეყნა.

გარდა ამისა, გუშინ ოპოზიციის მიერ გამართულ აქციაზე პარლამენტთან, მოქალაქეებს მიხეილ სააკაშვილის სახელებით ბანერები ეჭირათ. ისინი ექსპრეზიდენტის დაბრუნებასა მოითხოვდნენ. აღნიშნულს, სააკაშვილი გამოეხმაურა და იქ შეკრებილ საზოგადოებას მადლობა გადაუხადა.