საზოგადოებრივი მაუწყებლის ახალი და მიმდინარე ამბების ბლოკის დირექტორი გიორგი გვიმრაძე თანამშრომლების პასუხად აცხადებს, რომ მაუწყებელში მიმდინარეობს რეორგანიზაცია და ამის შემდეგ გახდება ცნობილი, მათი მოთხოვნების რა ნაწილი დაკმაყოფილდება.

გვიმრაძის თქმით, აღნიშნული რეორგანიზაცია ითვალისწინებს როგორც ხელფასების გადახედვას, ისე თანამშრომელთა ნაწილის სამსახურიდან გათავისუფლებასაც.

როგორც გვიმრაძემ On.ge-ს განუცხადა, მაუწყებლის მენეჯმენტს თანამშრომლების წერილი ჯერ ოფიციალურად არ ჩაბარებია და როცა ეს მოხდება, სწორედ ამის შემდეგ, პუნქტობრივად, დეტალურად განიხილავენ მათ მოთხოვნებს.

საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, დღეს, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვენ.

მოამბის ჟურნალისტის, ლაშა მესხის თქმით, თუ მათი მოთხოვნები არ დაკმაყოფილდება, ისინი 21 დღეში გაიფიცებიან.