ფინანსთა მინისტრის, ივანე მაჭავარიანის განცხადებით, კორონავირუსის ვაქცინის შესახებ "სანდო წყაროებიდან" მიღებული ყოველდღიური ინფორმაციები, მათ იმედს აძლევთ, რომ ეკონომიკური ზრდის 4,3 პროცენტიანი პროგნოზი, ხელახლა დაუბრუნდება 5 პროცენტს.

"დამაიმედებელი ინფორმაცია მოდის ყოველდღიურად ვაქცინის შესახებ, საკმაოდ სანდო წყაროებიდან, ეს იმედს გვაძლევს, რომ 4,3% პროგნოზი, ხელახლა დაუბრუნდება 5%-იანს. ამ შემთხვევაში, მე ჩვენს ხედვას მოგახსენებთ, თუმცა ბიუჯეტი მაინც დაიგეგმა 4,3%-ის ფარგლებში, რადგან უნდა ვიყოთ ფრთხილი და მოზომილი ამ შემთხვევაში", — განაცხადა მაჭავარიანმა.

11 ნოემბერს საერთაშორისო სავალუტო ფონდმა გამოაქვეყნა დოკუმენტი, სადაც ნათქვამი იყო, რომ 2021 წელს პანდემიის ეფექტის გავლენის ფონზე, საქართველოს ეკონომიკური ზრდა 4,3% იქნება. წინა ანგარიშის თანახმად, პროგნოზი 5 პროცენტი იყო, მისი შემცირება კი, IMF-ის განცხადებით, რეგიონში მიმდინარე კონფლიქტმა და საქართველოში არსებულ ეპიდსიტუაციამ გამოიწვია.