ევროპული საქართველოს ერთ-ერთი ლიდერის, სერგი კაპანაძის განცხადებით, აშშ-ს სახელმწიფო მდივნის, მაიკ პომპეოს საქართველოში ჩამოსვლის ერთ-ერთი მიზეზი ქვეყანაში შექმნილი კრიზისია. მისი თქმით, ევროპული საქართველო მუდმივად აწვდის ინფორმაცია საქართველოს დასავლელ პარტნიორებს ქვეყანაში მიმდინარე მოვლენების შესახებ.

"ერთ-ერთი მიზეზი, რატომაც ჩამოდის მაიკ პომპეო საქართველოში, არის ის პოლიტიკური კრიზისი, რომელიც ქვეყანაშია შექმნილი. [...] ჩვენ მათთან ვართ სრულ კომუნიკაციაში, როგორც სახელმწიფო დეპარტამენტთან, ისე საელჩოსთანაც და ჩვენ ამერიკელ პარტნიორებთან და ყველა ინფორმაციას მათ ვაწვდით", — აცხადებს კაპანაძე.

მისი თქმით, პომპეოს საქართველოში ჩამოსვლა ქართული ოცნების მხარდაჭერას არ ნიშნავს.

"აქედან გამომდინარე, სახელმწიფო მდივნის ვიზიტი, მათ შორის, მოიცავს იმ თემებსაც, რაც არის დღეს პრობლემატური და კრიზისული საქართველოში, ანუ გაყალბებული არჩევნები. ამრიგად, საუბარი იმაზე, რომ ეს არის მხარდაჭერა ხელისუფლების და გაყალბებული არჩევნების აღიარება, არის ტყუილი", — აცხადებს კაპანაძე.

კაპანაძე აღნიშნავს, რომ მაიკ პომპეოს ვიზიტი კიდევ ერთხელ ადასტურებს აშშ-ს ერთგულებას საქართველოს, როგორც სტრატეგიული პარტნიორის მიმართ.

"ეს არის ვიზიტი ქვეყანაში, რომელიც არის საინტერესო ამერიკისათვის და რომელიც არის ამერიკის პარტნიორი ქვეყანა. აქედან გამომდინარე, ამერიკის შეერთებული შტატებს, როგორც ბევრჯერ უქნია აქამდე, როდესაც თავის განცხადებებში დაუდასტურებია თავისი ერთგულება საქართველოს სტრატეგიული პარტნიორობისადმი, დაუდასტურებია თავისი ინტერესი საქართველოში დემოკრატიისადმი, სწორედ ამისი გაგრძელება არის ეს ვიზიტი", — განაცხადა სერგი კაპანაძემ.

აშშ-ს სახელმწიფო მდივნის, მაიკ პომპეოს ვიტიზი თბილისში 17-18 ნოემბერს გაიმართება.

გაიგეთ მეტი: