ნაციონალური მოძრაობის ერთ-ერთი ლიდერი, ხატია დეკანოიძე ამბობს, რომ პარტიის თავმჯდომარის, გრიგოლ ვაშაძის პირველი განცხადება ინტერპრეტაციების საშულება იძლეოდა. მისი თქმით, სხვა გაუგებრობა არ ყოფილა. ამასთან, დეკანოიძის თქმით, გრიგოლ ვაშაძის მეორე განცახდება კარგია, რადგან იგი ინტერპრეტაციის საშულებას აღარ ტოვებს.

"ყველა განცხადება მისი აქამდე იყო პრეს ცენტრთან შეთანხმებული. ჩვენ არ ვართ ცალკე, დამოუკიდებელი ფიგურები პოლიტიკურ ბრძოლაში, ჩვენ წარმოვადგენთ პარტიას, ამიტომ რა თქმა უნდა, გარკვეული ინტერპრეტაციები განცხადებებმა არ უნდა დატოვოს. ეს იყო გაუგებრობა, რომელიც მოიხსნა. მე მგონი, ყველაფერი აშკარაა, ამიტომ შესაბამისად, არავითარი სხვა გაუგებრობა არ იყო, ერთადერთი რაც იყო, ეს არის, ის რომ ინტერპრეტაციების საშულება დატოვა პირველმა განცხადებამ", — განაცხადა დეკანოიძემ.

დღეს გავრცელდა ენმ-ის თავმჯდომარის, გრიგოლ ვაშაძის განცხადება, სადაც ის პოლიტიკურ პარტიებს მოუწოდებს, პროცესი მშვიდობიან მაგიდასთან გადაიტანონ და ჩაანაცვლონ ქუჩა ყველა დონის საკანონმდებლო ორგანოების ტრიბუნით.

ამ განცხადებიდან მალევე ვაშაძემ დამატებით განმარტებები ფეისბუქზე გაავრცელა და დაწერა, რომ პროტესტი უნდა გაგრძელდეს, მაგრამ დაემატოს პოლიტიკური კომპონენტი. ესენია:

  • მოქალაქეთა პროტესტი უნდა გაგრძელდეს;
  • ამ პროტესტს სასწრაფოდ უნდა დაემატოს პოლიტიკური კომპონენტი — სამართლიანი არჩევნების პრინციპების განხორციელების თაობაზე მოლაპარაკებების სახით სტრატეგიული მოკავშირეების მედიაციით;
  • სანამ/თუ მოლაპარაკებები წარმატებით არ დასრულდება არც მეორე ტურში მონაწილეობას არ ვღებულობთ და არც პარლამენტში არ შევდივართ;
  • ერთხელ და სამუდამოდ ყველა უნდა დავიძაბოთ, რომ მომავალში ქუჩის პროტესტმა ნორმალური პროცესი არ ჩაანაცვლოს არჩევნების გაყალბების გამო".

ოპოზიციის წარმომადგენლები 31 ოქტომბერს ჩატარებული არჩევნების ლეგიტიმაციას არ ცნობენ და საპარლამენტო მანდატებზე უარს ამბობენ. არც ერთი პარტია, რომელმაც 1%-იანი ბარიერი გადალახა, პარლამენტში არ შედის. ისინი პერმანენტულ აქციებს აანონსებენ და მთავრობას ცენტრალური საარჩევნო კომიისიის თავმჯდომარის, თამარ ჟვანიას გადაყენებასა და რიგგარეშე არჩევნების დანიშვნას მოითხოვენ. პარლამენტთან გაიმართა რამდენიმე აქცია, ასევე გაიმართა მსვლელობა ცესკოსკენ, სადაც სპეცრაზმმა წყლის ჭავლის გამოყენებით მომიტინგეები დაშალა.