ნაციონალური მოძრაობის ერთ-ერთი ლიდერი, ხატია დეკანოიძე ამბობს, რომ აქციაზე მონაწილეების დაკავება "უკანონობას" ემსახურებოდა. მისი თქმით, მმართველი ძალა "ტერორისტებს ვერ იჭერს", ხოლო "ორი კინკილა" შეშის გამო ადამიანებს დასდევს.

"ეს ყველაფერი ემსახურება უკანონობას, ჯერ ერთი, ის გადაწყვტეილება, რომელიც მიიღო მთავრობამ, გასულია საკონსტიტუციო ჩარჩოდან. წარმოუდგენელია, რომ ტერორისტებს ვერ იჭერენ და ადამიანებს ორი კინკილა შეშის გამო დასდევენ. ნადირობენ ადამიანებზე", განაცხადა დეკანოიძემ.

პარლამენტთან მიმდინარე აქციაზე მოძრაობა სირცხვილიას რამდენიმე აქტივისტი დააკავეს. როგორც ერთ-ერთი სამოქალაქო აქტივისტი, მარიამ გეგუჩაძე ამბობს, დაკავებულები არიან ლექსო მაჭავარიანი, გიორგი მჟავანაძე და ნოდარ რუხაძე. მისი თქმით, დაკავებები მას შემდეგ დაიწყო, რაც აქციაზე გათბობის მიზნით შეშის შეტანა სცადეს.

დღეს მოძრაობა სირცხვილია პარლამენტთან აქციას მართავს. მათი აქცია 22:00 საათიდან 05:00 საათამდეა დაგეგმილი. ეს აქცია გადაადგილების შეზღუდვის ამოქმედებასთან ერთად მიმდინარეობს. აქტივისტების განცხადებით, დღეს ისინი ამ შეზღუდვებს "დაუმორჩილებლობას" უცხადებენ.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.