რუსთაველზე, პარლამენტის მიმდებარედ შეკრებილმა ოპოზიციამ შაბათს კიდევ ერთი აქცია დააანონსა. ამის შესახებ ნაციონალური მოძრაობის ერთ-ერთმა ლიდერმა, ნიკა მელიამ განაცხადა. მანვე თქვა, რომ დღეს შეკრებილ მოქალაქეებს ამაღამ ტერიტორიაზე დარჩენას ვერ დაავალდებულებს.

"აქ არის ძალიან ბევრი ახალგაზრდა, ვინც აპირებს დღეს რუსთაველის გამზირზე დარჩენას და პროტესტის გაგრძელებას. მაგრამ სწორად გამიგეთ, ძალიან დიდ პატივს გცემთ თქვენ, მიუხედავად განსხვავებული პოლიტიკური ოპოზიციური შეხედულებებისა. მაგრამ გვინდა, რომ ენერგია შემოგანახინოთ, გვინდა, რომ იყოთ შემართებით, ჯანმრთელები და მხნედ, მათ შორის შაბათისთვის. ამიტომ ვერც ერთ თქვენგანს აქ ყოფნას ვერ დავავალდებულებ, სწორად გამიგეთ. მე, ბუნებრივია, აქ დავრჩები მეგობრებთან ერთად, მაგრამ ეს იმას არ ნიშნავს, რომ თქვენც უნდა დარჩეთწ. საკმარისად დავრჩებით, ბავშვები, ახალგაზრდები დავრჩებით, ჩვენ მათ ვერ მივატოვებთ, სორად გამიგეთ. მაგრამ ეს იმას არ ნიშნავს, რომ ბებიები, ბაბუები და უფროსი თაობის წარმომადგენლები, ახალგაზრდების ნაწილიც, ყველანი უნდა დავრჩეთ. ძალიან უხერხული ასახსნელია, მაგრამ მოცემულობა ისეთი შემქნა ამ რეჟიმმა, რომ გონივრულები და პრაგმტულები უნდა ვიყოთ", — თქვა მელიამ.

მისივე თქმით, შეუძლია დარჩენა სთხოვოს მოქალაქეებს, მაგრამ არ უნდა და "ინდივიდუალური პასუხისმგებლობის საკითხიც არის".

პარლამენტთან ოპოზიციის მიერ ორგანიზებული აქცია ამ დრომდე მიმდინარეობს. 22:00 საათზე კი მოძრაობა #სირცხვილია გამართავს კიდევ ერთ აქციას, სახელწოდებით დაუმორჩილებლობა. დღეს, ღამის ათი საათიდან ძალაში შედის მთავრობის ახალი რეგულაცია, რომელიც 22:00 საათიდან 05:00 საათამდე გადაადგილების შეზღუდვას ითვალისწინებს. დარღვევისთვის ჯარიმა 2 000 ლარია. აქცია სწორედ დროის ამ პერიოდშია დაგეგმილი.