ცესკოსთან გამართული აქციის დაშლისას დაშავებულის, ზაზა გუგავას განცხადებით, წყლის ჭავლი გაფრთხილების გარეშე გამოიყენეს მაშინ, როდესაც ამის საჭიროება არ ყოფილა.

"განვითარდა ისე მოვლენები, როგორც არავინ არ ელოდა. ეს აუცილებლობა არ არსებობდა, რომ გამოყენებული ყოფილიყო ჭავლი. არავინ არსად არ შერბოდა, არავინ არაფერს კანონსაწინააღმდეგოს არ აკეთებდა და ყველანაირი გაფრთხილების გარეშე წამოვიდა წყლის ჭავლი", — განაცხადა გუგავამ TV პირველის ეთერში.

გუგავას თქმით, ჭავლმა მისი დაცემა გამოიწვია, მას შემდეგ კი, რაც აქციის მონაწილეები დაეხმარნენ და გამოიყვანეს, შენიშნა, რომ ერთი თვალიდან ვერაფერს ხედავდა.

"მოძრაობაში ეს მახსოვს, რომ ძლიერი ნაკადი მომხვდა სახეში, შემდეგ მიდამოში და ამაგდო ამ მთლიანმა წნევამ და დავეცი სახით. შემდეგ მომიტინგეები მოგვეხმარნენ და გამომიყვანეს, ერთი თვალიდან საერთოდ ვერ ვხედავდი ვერაფერს და მქონდა ძლიერი ტკივილი. ყოფილი ძალოვანი ვარ, აფხაზეთის ომის ვეტერანი ვარ, დაჭრილი, მეორე ჯფუგის ინვალიდი და მე უბრალოდ მრცხვენოდა მათ გამო, რომ ასე საკუთარ ხალხს არ უნდა ექცეოდეს სახელმწიფო და ძალოვანი სტრუქტურები", — ამბობს გუგავა.

სპეცრაზმმა აქცია გაფრთხილების გარეშე დაშალა — რა ხდება ცესკოსთან

8 ნოემბერს ოპოზიციამ პარლამენტთან საპროტესტო აქცია გამართა, რომელზეც მთავრობას სამი მოთხოვნა წამოუყენა და დრო რვა საათამდე მისცა. ისინი ხელახალ არჩევნებს, ცესკოს თავმჯდომარის გადადგომას და პოლიტპატიმრების გათავისუფლებას ითხოვდნენ. ულტიმატუმის ვადის ამოწურვის შემდეგ ნიკა მელიამ განაცხადა, რომ მათთან კონტაქტზე მყოფმა ირაკლი კობახიძემ და არჩილ თალაკვაძემ ხვალ შეხვედრა შესთავაზეს, რასაც არ დათანხმდებოდნენ. ეს კობახიძემ უარყო და ამტკიცებდა, რომ შეხვედრა ოპოზიციამ მათ შესთავაზა და ამას მხოლოდ პარტნიორების სურვილის შემთხვევაში დათანხმდებოდნენ.

რვა საათის შემდეგ ოპოზიციამ განაცხადა, რომ ცესკოსთან გადაინაცვლებდნენ და არავის მისცემდნენ შიგნით შესვლის ან იქედან გამოსვლის უფლებას. სანამ ოპოზიცია მსვლელობით მივიდოდა, ცესკოსთან რამდენიმე ადამიანი შეიკრიბა. ადგილზე მობილიზებული იყო პოლიცია, რომელთა რაოდენობამ იზრდებოდა. ცესკოსთან მოხდა რამდენიმე დაპირისპირებაც, თუმცა მალევე აღმოიფხვრა.

ამის შემდეგ კი ადგილზე სპეცრაზმი გამოჩნდა, რომელმაც გაფრთხილების გარეშე დაიწყო წყლის ჭავლის გამოყენება აქციის მონაწილეების წინააღდეგ. აქციაზე გაუშვეს სავარაუდოდ ცრემლსადენი გაზიც, თუმცა შსს ამას უარყოფს. რაც შეეხება წყლის ჭავლს, ამას პროპორციულ ძალად მიიჩნევს. ამ ეტაპზე არსებული ინფორმაციით, აქციის დაშლისას 2 ადამიანი დაშავდა.

უფლებადამცველები, ყოფილი და მოქმედი სახალხო დამცველები კი აცხადებენ, რომ აქციის დაშლა ამ მეთოდით არაკანონიერი იყო და არღვევდა გამოხატვის თავისუფლებას. მათივე თქმით, ეს იყო სასტიკი და არაპროპორციული ძალა.

გაიგეთ მეტი მომხდარის პოლიტიკურ შეფასებებზე: