ევროპული საქართველოს ერთ-ერთი ლიდერის, გიგა ბოკერიას განცხადებით, ის, რომ ოპოზიცია პარლამენტში არ შედის, კარგი არაა, მაგრამ ამის ალტერნატივა იმასთან შეგუებაა, რაც ბელარუსში ხდება. ამის შესახებ მან TV პირველთან ინტერვიუში ისაუბრა.

"არ არის კარგი ამბავი, რომ პარლამენტში არ შედის ოპოზიცია. არც ის არის კარგი, რომ ამაზე გვიწევს ლაპარაკი, ოღონდ ამის ალტერნატივა არის შეგუება იმასთან, რაც ხდება ბელარუსში, ანუ ბევრად უარესი და ბევრად უფრო დიდი ფასი, რასაც ჩვენი ხალხი და ჩვენი შვილები გადაიხდიან წლების განმავლობაში", — აცხადებს ბოკერია.

31 ოქტომბრის საპარლამენტო არჩევნების შედეგებს ოპიზიცია არ აღიარებს და ქუჩაში საპროტესტო აქციებს მართავს. პარტიებმა საკანონმდებლო ორგანოში შესვლაზე უარი უკვე თქვეს. დიდი აქციაა დაგეგმილი კვირას, 8 ნოემბერს პარლამენტის შენობასთან, რუსთაველის გამზირზე. ისინი ხელახალი არჩევნების ჩატარებას მოითხოვენ.