ლელოს გენერალურმა ლიდერმა, ბადრი ჯაფარიძემ საერთო ოპოზიციური მსვლელობის დროს განაცხადა, არჩევნების შედეგებს არ ცნობენ და პროსტესტს ამაზე ყოველ დღე გამოხატავენ.

"ეს არის ერთ-ერთი მშვიდობიანი აქცია. შესაბამისად, ოპოზიცია გააგრძელებს უწყვეტ პროტესტს. ჩვენ ვიყენებთ ყველა სამართლებრივ ბერკეტს და სამართლებრივ ინსტრუმენტს, რომელიც დღეს კანონით არის გათვალისწინებული. ამის პარალელურად, საერთაშორისო საზოგადოება მზად არის, ჩაერთოს განხილვებში, რომელიც ათასობით სარჩელს მოიცავს. [...]

სარჩელების განუხილველად დატოვება არის თვალის დახუჭვა იმ აღმაშფოთებელ დარღვევებზე და გაყალბებაზე, რომელსაც ადგილი ჰქონდა. ამიტომ, მე მოვუწოდებ ცესკოს, მოვუწოდებ ხელისუფლებას, რომ ყველა საჩივარი, რომელიც მომზადებულია ოპოზიციური პარტიების მხრიდან, იქნეს განხილული საერთაშორისო საზოგადოების ჩართულობით. ეს არის მნიშვნელოვანი. საზოგადოებამ უნდა იცოდეს, რომ პროტესტი არის ძალიან საფუძვლიანი", — განაცხადა ბადრი ჯაფარიძემ.