საქართველოს შინაგან საქმეთა სამინისტროს ინფორმაციით, გუშინ, გლდანში მომხდარი სროლის გამო ორი ადამიანი დააკავეს.

უწყების ინფორმაციით, ერთ-ერთმა ბრალდებულმა მეორე ბრალდებულთან ერთად, მიწის ნაკვეთისთვის არსებული კონფლიქტის გამო, თავისი ნათესავისა და იმის მეგობრის მიმართულებით ცეცხლსასროლი იარაღიდან რამდენჯერმე გაისროლა. შსს-ში ამბობენ, რომ დაზიანდა ავტომობილი, თუმცა დაშავებულები არ არიან.

"ბრალდებულები შემთხვევის ადგილიდან მიიმალნენ, თუმცა პოლიციამ ორივე პირი მომხდარიდან მალევე- რამდენიმე საათში, თბილისში დააკავა. სამართალდამცველებმა ზ.მ.-ის მართვის ქვეშ არსებული ავტომობილიდან ნივთმტკიცების სახით ამოიღეს დანაშაულის ჩადენის იარაღები", — აცხადებენ შსს-ში.

მათივე ინფორმაციით, გამოძიება დამამძიმებელ გარემოებაში ორი ან მეტი პირის მიმართ ჩადენილ განზრახ მკვლელობის მცდელობისა და ცეცხლსასროლი იარაღის უკანონო შეძენა-შენახვა-ტარების ფაქტზე, საქართველოს სისხლის სამართლის კოდექსის 19-109-ე მუხლის მე-3 ნაწილის "ა" ქვეპუნქტით და 236-ე მუხლის მე-3 და მე-4 ნაწილებით მიმდინარეობს.