ცენტრალური საარჩევნო კომისიის თავმჯდომარის, თამარ ჟვანიას თქმით, პანდემიის გამო არჩევნებამდე რამდენიმე დღით ადრე კომისიის წევრების ჩანაცვლება უწევდათ, რაც არჩევნების პროცესზეც აისახა.

როგორც ჟვანია ამბობს, ეს საკითხები აისახა კომისიის წევრების კომპეტენციაზეც და დაშვებული იყო ბევრი ადამიანური შეცდომა.

"როდესაც ოქმში არის არასწორი მონაცემები, თუნდაც ერთი ხმა, ან ორი ხმა, თუნდაც ბეჭედია დავიწყებული, ან თარიღია გამოტოვებული, ან მონაწილეთა რაოდენობაა არასწორად შეყვანილი და დაჯამებული... ეს ყველაფერი გამოწვეულია ამ ძალიან რთული რეჟიმიდან, ჩემი აზრით", — განაცხადა ჟვანიამ პირველი არხის ეთერში.

არასამთავრობო ორგანიზაციები და პოლიტიკური პარტიები ოქმების დისბალანზე საუბრობენ. ჟვანიას განმარტებით, ზოგიერთი ოქმი სწორად არის შევსებული, თუმცა პოლიტიკური პარტიები მათ არასწორად წარმოაჩენენ.

რაც შეეხებათ არასამთავრობოებს, ISFED აცხადებს, რომ საარჩევნო პროცესის სანდოობის გაზრდის მიზნით, საარჩევნო ადმინისტრაციამ ხმები თავიდან უნდა გადათვალოს იმ უბნებზე, სადაც ბიულეტენების მეტობა დაფიქსირდა. ISFED-ის აღმასრულებელი დირექტორი, ელენე ნიჟარაძე ამბობს, რომ საარჩევნო უბნების 8 პროცენტზე, შემაჯამებელი ოქმების დისბალანსის შემთხვევები დაფიქსირდა. კერძოდ, ბიულეტენების რაოდენობა აღემატებოდა ამომრჩეველთა სიაში ხელმოწერების რაოდენობას.