კურორტ გოდერძიზე, პირველ იანვარს, უბედური შემთხვევის შედეგად დაშავებული თემურ გაბაიძე დღეს დაიღუპა. ინფორმაციას ამის შესახებ საზოგადოებრივი მაუწყებლის აჭარის ტელევიზია ავრცელებს. გაბაიძე ფეხსაცმლის ზონარს იკრავდა, როდესაც თხილამურებით გადაუარეს, რის შედეგადაც თავის ტრავმა მიიღო.

დაღუპულის ოჯახის წევრების თქმით, გაბაიძის გარდაცვალების მიზეზი, შესაძლოა, გახდა ის, რომ ადგილზე დროულად ვერ აღმოუჩინეს დახმარება. აჭარის ტელევიზიის ცნობით, გაბაიძე ტრავმის მიღებიდან სამედიცინო დაწესებულებაში 5 საათის შემდეგ გადაიყვანეს.

აჭარის ტელევიზიის ინფორმაციით, გამოძიება სისხლის სამართლის კოდექსის 116 მუხლით მიმდინარეობს, რაც სიცოცხლის გაუფრთხილებლობით მოსპობას გულისხმობს.

31 წლის თემურ გაბაიძე 2011-2012 წლებში აჭარის ფინანსთა და ეკონომიკის მინისტრის მოადგილე იყო. მას შემდეგ კი კერძო სექტორში საქმიანობდა.