გირჩის ლიდერის, ზურაბ ჯაფარიძის განცხადებით, მათ ოპოზიციურ პარტიებთან კონსულტაციები აქვთ და თუ პარლამენტში არავინ არ შევა, მაშინ "გირჩიც არ შევა".

"ოპოზიციურ პარტიებთან გვაქვს კონსულტაციები, თუ იქნება საერთო შეთანხმება, როგორც იყო არაერთი სხვა შეთანხმება წინა თვეების განმავლობაში ოპოზიციურ ფლანგზე, გირჩი იქნება ამ შეთანხმების ნაწილი. თუ არავინ არ შევა, გირჩიც არ შევა", — განაცხადა ჯაფარიძემ.

ჯაფარიძის თქმით, პლუსებს და მინუსებს ორივე შემთხვევაში ხედავს. მისი განცხადებით, იმ შემთხვევაში თუ გირჩი პარლამენტში შევა, მათ ექნებათ საპარლამენტო ტრიბუნა, რომ "აჯანჯღარო ხელისუფლება".

"რომელი ჯობია? არ ვიცი, არ მაქვს გადაწყვეტილი. პლუსებს იქაც ვხედავ და მინუსებს იქაც ვხედავ. მაგალითად, შესვლის შემთხვევაში, გაქვს საპარლამენტო ტრიბუნა და შეგიძლია, ჩემი აზრით, გარდაუვალია კრიზისი ახლა რომ გაღრმავდეს და შეგიძლია, საპარლამენტო ტრიბუნიდან აჯანჯღარო ხელისუფლება, ვადამდელი იქიდან მოითხოვო და არა ქუჩიდან", — თქვა ჯაფარიძემ.

31 ოქტომბერს გამართულ საპარლამენტო არჩევნების შედეგებს ოპოზიცია არ აღიარებს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა.

ამავე თემაზე: