კორონავირუსით ინფიცირებულთან კონტაქტის გამო ჯანდაცვის მსოფლიო ორგანიზაციის დირექტორი, ტედროს ადანომ გებრეისუსი თვითიზოლაციაში გადავიდა. გებრეისუსი ტვიტერზე წერს, რომ მას სიმპტომები არ აქვს და თავს კარგად გრძნობს.

"კრიტიკულად მნიშვნელოვანია, რომ რეკომენდაციები დავიცვათ. სწორედ ასე გავწყვეტთ კორონავირუსის გადაცემის ჯაჭვს, ჩავახშობთ ვირუსს და დავიცავთ ჯანდაცვის სისტემას", — დაწერა ჯანმოს დირექტორმა.

ტედროს გებრესიუსი, როგორც ჯანდაცვის მსოფლიო ორგანიზაციის დირექტორი, ფართო საზოგადოებამ პანდემიის დაწყების შემდეგ გაიცნო. ის სხვადასხვა ქვეყნის ლიდერთან და წამყვან მეცნიერებთან ერთად ვაქცინის შექმნაშიც არის ჩართული.

პანდემიასთან დაკავშირებით დაგვიანებული რეაქციის გამო მას აკრიტიკებს აშშ-ს პრეზიდენტი, დონალდ ტრამპი. გარდა ამისა, ტრამპი ამბობს, რომ გებრესიუსს ჩინეთის მიმართ, რომელმაც დამალა ვირუსის არსებობა, მკაცრი პოზიცია არ ჰქონდა.