აშშ-ის საელჩო საქართველოში განცხადებას ავრცელებს სადაც ნათქვამია, რომ მოსყიდვა, დაშინება, ძალადობა და საარჩევნო პროცესის დამაზიანებელი სხვა მსგავსი ფაქტები არ არის საკმარისი 31 ოქტომბრის არჩევნების შედეგეების არალეგიტიმურად ცნობისთვის.

"საარჩევნო პროცესის ხელყოფის ეს მცდელობები: ამომრჩევლის დაშინება, მოსყიდვა, ხმის მიცემის ფარულობის დარღვევა, პარტიული და ოფიციალური საქმიანობის არამკვეთრი გამიჯვნა და საარჩევნო დამკვირვებლებსა და ჟურნალისტებზე ძალადობა, მიუხედავად იმისა, რომ შედეგების არალეგიტიმურად ცნობისთვის არ არის საკმარისი, განაგრძობს საქართველოს საარჩევნო პროცესის დაზიანებას და მიუღებელია", — ვკითხულობთ საელჩოს განცხადებაში.

განცხადებაში ვკითხულობთ, რომ ყველა დასაბუთებული დარღვევა მიუკერძოებლად უნდა გამოიძიონ შესაბამისმა სახელმწიფო უწყებებმა.

"სარწმუნო საჩივრების სამართლიანად, გამჭვირვალედ და დროულად გადაწყვეტა მნიშვნელოვანია, იმისთვის, რომ ქართველ ხალხს ჰქონდეს ნდობა არჩევნების შედეგების ლეგიტიმურობის მიმართ", — წერს საელჩო.

აშშ-ს საელჩო მოუწოდებს პარტიებს, გაითვალისწინონ 31 ოქტომბრის არჩევნების გამოცდილება მეორე ტურში და შემდგომ არჩევნებშიც. განცხადების მიხედვით, აშშ ყურადღებით აკვირდება საჩივრების განხილვისა და აპელაციის პროცესს.

აშშ-ს საელჩო იზიარებს ეუთო/ოდირის პირველად შეფასებას არჩევნების კონკურენტულ გარემოში ჩატარებისა და იმის შესახებ, რომ "ამომრჩევლებზე ზეწოლის შესახებ ფართოდ გავრცელებული ბრალდებები და მმართველ პარტიასა და სახელმწიფოს შორის საზღვრის ბუნდოვანება საარჩევნო პროცესის ზოგიერთი ასპექტის მიმართ საზოგადოების ნდობას ამცირებდა".

"ჩვენ მოვუწოდებთ მომდევნო მოწვევის პარლამენტს, გაატაროს დამატებითი რეფორმები იმ ხარვეზების აღმოსაფხვრელად, რაც აღნიშნულია ოდირის საარჩევნო შეფასებებში", — ვკითხულობთ საელჩოს განცხადებაში.

საელჩო აღნიშნავს, რომ აშშ განაგრძობს საქართველოს მხარდაჭერას უფრო ძლიერი დემოკრატიის ასაშენებლად.