ერთიანი ნაციონალური მოძრაობის ერთ-ერთი ლიდერის და გლდანის მაჟორიტარობის კანდიდატის, ნიკა მელიას თქმით, კახა კალაძის მეგობარმა, დათო კვიჟინაძემ მისი შტაბის წევრს იარაღი დაუმიზნა, პოლიციამ კი მის მაგივრად, შტაბის წევრი დაიჭირა.

"მობილიზაცია არის ყველა კრიმინალის. იქამდე მივიდნენ, რომ კრიმინალები და პოლიციელები ერთად მივარდნენ გლდანის პირველ მიკრო რაიონში 84-ე საარჩევნო უბანთან და იარაღის მუქარით, დათო კვიჟინაძემ, რომელიც არის კახა კალაძის ბავშვობის მეგობარი, დაუმიზნა იარაღი იქ მყოფ დამკვირვებელს. ამ დროს პოლიციელებმა ჩვენი დამკვირვებელი, ირაკლი ეძგვერაძე დააკავეს", — ამბობს მელია.

ის, ასევე, ამბობს, რომ გლდანში ქართული ოცნების კანდიდატი, ლევან კობიაშვილი, უპირობოდ მარცხდება.

"თქვენ თვალ-ყურს ადევნებთ, რა ხდება გლდანში, მაგრამ, დამერწმუნეთ, იმაზე უფრო შემაშფოთებელია სიტუაცია, ვიდრე მაყურებელს ჰგონია. არ ჩანს და არ იგრძნობა ის დაძაბულობა, რაც არის გლდანის რაიონში, რომლის სულის ჩამდგმელი არის ხელისუფლება კრიმინალთან ერთად. უკანასკნელი მონაცემებით, გლდანის რაიონში უპირობოდ მარცხდება კობიაშვილი, ეს იციან მათ არანაკლებ უკეთ, ვიდრე მე ვიცი და აქედან გამომდინარე, ხედავთ, რას აწყობენ", — განაცხადა მელიამ.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: