ამ კვირაში ტაივანის ჯარის კოლექტიური ქორწინების ყოველწლიურ ცერემონიაში ერთნაირსქესიანთა ორი წყვილი დაქორწინდება. ეს პირველად ხდება მას შემდეგ, რაც ქვეყნის მთავრობამ ქორწინების თანასწორობა ლეგალური გახადა 18 თვის წინ.

პარასკევს, 30 ოქტომბერს, ამ ცერემონიის დროს სხვებთან ერთად ორი ქალი ჯარისკაცი და მათი არასამხედრო პარტნიორები იქორწინებენ.

ტაივანი, რომელიც თვითმმართველი დემოკრატიაა, აზიის ერთ-ერთ ყველაზე პროგრესულ თემად იქცა, როდესაც 1980-იანების მიწურულს მასში არსებული ავტორიტარული მმართველობა შეიცვალა. ის რეგიონში პირველი ადგილი გახდა, სადაც 2019 წლის მაისში ერთნაირსქესიანთა ქორწინება კანონიერი გახდა.

"ჩვენი ქვეყანა... გახდა აზიაში პირველი, რომელმაც ერთნაირსქესიანთა ქორწინება ლეგალური გახადა. სამინისტრო ულოცავს იმ ლგბტ სამხედროებს, რომლებიც ქორწინდებიან", — განაცხადა ტაივანის სამხედრო ძალებმა.

მათ Facebook-ზე პარასკევის ცერემონიაში მონაწილე წყვილების ათობით ფოტო დაიდო და ხალხს სთხოვეს, თავიანთი ფავორიტი აერჩიათ. ვანისა და მენის (იხ. ქვემოთ) ფოტომ 31 000-ზე მეტი მოწონება დააგროვა.

ფოტო: Republic of China Army

"შენ ჩვენს ქვეყანას იცავს, ჩვენ კი — შენს თავისუფლებას", — ეწერა ერთ-ერთ კომენტარში. ტაიპეის (ტაივანის დედაქალაქის) მერიის საბჭოს წევრმა კი დაწერა: "სიყვარული ტაივანს აძლიერებს. დაილოცოს ყველა შეყვარებული ადამიანი და გაუმარჯოს ეროვნული ჯარის მუდმივ განვითარებას".

"ეს კარგია არა მხოლოდ ლგბტ თემისთვის, არამედ ჯარისთვისაც. ეს იმის მტკიცებულებაა, რომ ლგბტ ადამიანებს შეუძლიათ, ჰქონდეთ სხვებთან თანასწორი უფლებები, და ასევე შეუძლიათ ჩვენი ქვეყნის დაცვა", — განაცხადა ლგბტ თემის ცნობადობაზე პასუხისმგებელმა სოციალური მედიის ჯგუფმა The Guardian-თან საუბრისას.

წინა წლის ცერემონიაში ერთნაირსქესიანთა სამ წყვილს უნდა მიეღო მონაწილეობა, თუმცა მათ გადაიფიქრეს.

2019 წლის ახალი კანონის მიღების შემდეგ უკვე ათასობით წყვილი დაქორწინდა. მართალია, ეს კანონი ლგბტქ თემის დიდი გამარჯვებაა, მაგრამ ის სრულ თანასწორობას არ იძლევა: ტაივანელებს იმავე სქესის უცხოელებზე დაქორწინება მხოლოდ იმ შემთხვევაში შეუძლიათ, თუკი პარტნიორის სამშობლო ასევე ლეგალურად ცნობს ქორწინების თანასწორობას.

ბავშვის აყვანისა და სუროგაციის უფლებებიც უფრო მკაცრია, ვიდრე ჰეტეროსექსუალი წყვილებისთვის — გეი პარტნიორებს მხოლოდ ერთ-ერთ მათგანთან ბიოლოგიურად მონათესავე ბავშვების აყვანა შეუძლიათ.

ერთობლივი ქორწინების ცერემონია ტაივანის პრაიდზე — ტაიპეიში გამართულ ყოველწლიურ ლგბტქ აღლუმზე — ერთი დღით ადრე იმართება.