დღეს დილით გირჩის ოფისში შსს-ს თანამშრომლები მივიდნენ. კრიმინალური პოლიციის თანამშრომლები ამოწმებენ, დათესილი მცენარე ნამდვილად მარიხუანაა თუ არა.

პარტიის ერთ-ერთი ლიდერის, იაგო ხვიჩიას თქმით, პოლიციელები აგრესიას არ გამოხატავენ და ისინი თავიანთ მოვალეობას ასრულებენ, ის დასძენს, რომ ამ ტემპით მუშაობის შემთხვევაში, მათი საქმიანობა მთელ დღეს წაიღებს:

"მიმდინარეობს საგამოძიებო მოქმედებები, სათითაოდ ხდება ყველა ფოთლის აღწერა, დალუქვა და მათზე ოქმის შედგენა. ჩვენ ამ ყველაფერს ველოდით და მშვიდად ვართ. გული მწყდება, რომ ჩვენს მცენარეებს წაიღებენ და არ ვარ დარწმუნებული, რომ სათანადოდ მოუვლიან".

ხვიჩიას თქმით, პირადად მას ვინმეს დაპატიმრების მოლოდინი არ აქვს.

10 დღეზე მეტი გავიდა მას შემდეგ, რაც პოლიტიკურმა პარტიამ, გირჩი, საკუთარ ოფისში მარიხუანის დათესვის შესახებ განცხადება გააკეთა. მცენარის დათესვა საქართველოს რამდენიმე ტელევიზიის პირდაპირ ეთერში გადაიცა. 3 დღის წინ კი პარტიის ფეისბუკის ოფიციალურ გვერდზე ახალამოსული მცენარეების ფოტოებიც გამოქვეყნდა.

შსს-მ გამოძიება 31 დეკემბერსვე დაიწყო, თუმცა ამ დრომდე პარტიის ოფისში სამართალდამცავები არ იყვნენ მისული და არც პარტიის წევრები დაუკითხავთ.

მარიხუანის საჯარო დათესვას წინ უძღოდა პარტიის ლიდერის, ზურაბ ჯაფარიძის განცხადება, რომელმაც მთავრობას ულტიმატუმი წაუყენა და მოსთხოვა, მომხდარიყო ნებისმიერი ნარკოტიკის დეკრიმინალიზაცია და მარიხუანის ლეგალიზაცია.