საქართველოს განათლებისა და მეცნიერების მინისტრის განცხადებით, ქუთაისის საერთაშორისო უნივერსიტეტში იფუნქციონირებს ადრონული თერაპიის ცენტრი, სადაც ორი ციკლოტრონი იქნება. ამის შესახებ მიხეილ ჩხენკელმა ქუთაისში, ქართული ოცნების საარჩევნო პროგრამის თემატურ პრეზენტაციაზე განაცხდა.

"ადრონული თერაპიის ცენტრში ჩვენ გვექნება ორი ციკლოტრონი, რომელთა აწყობა უკვე დაწყებულია მსოფლიოს ერთ-ერთ წამყვან კომპანიაში, IBA. ეს პროექტიც მთლიანად დაფინანსებულია ქართუ ფონდის მიერ. პირველი ციკლოტრონი მოხმარდება სიმსივნის მკურნალობას ულტრათანამედროვე მეთოდებით. ეს გახლავთ პროტონული თერაპია, რაც განსაკუთრებით მნიშვნელოვანია სიმსივნით დაავადებული ბავშვების მკურნალობისთვის. ხოლო მეორე ციკლოტრონი მთლიანად მოხმარდება სამეცნიერო კვლევით პროცესს ონკოლოგიაში, ბირთვულ და სამედიცინო ფიზიკაში", — განაცხადა ჩხენკელმა.

მისივე თქმით, პირადად შეხვდა მსოფლიოს წამყვან მეცნიერებს და მათ დიდი ენთუზიაზმი და მზაობა დააფიქსირეს, რომ "ჩამოვიდნენ ქუთაისში და ქართველ მეცნიერებთან ერთად აწარმოონ სამეცნიერო კვლევითი პროცესი". როგორც ჩხენკელი აღნიშნავს, ეს ნიშნავს იმას, რომ "ქუთაისის საერთაშორისო უნივერსიტეტმა და ადრონული თერაპიის ცენტრმა საქართველო დასვა მსოფლიო აკადემიურ და სამეცნიერო-კვლევით რუკაზე".