ლელოს ბათუმის ორგანიზაციაში აცხადებენ, რომ ქალაქის საარჩევნო უბნების მონიტორინგისას, მე-10 და 53-ე უბანზე ქართული ოცნების სააგიტაციო მასალები აღმოაჩინეს. პარტიის საარჩევნო ექსპერტი და უმაღლესი საბჭოს წევრობის კანდიდატი, ივანე ფირცხალაიშილი ქართულ ოცნებას და უმაღლეს საარჩევნო კომისიას არაკეთილსინდისიერებაში ადანაშაულებს.

"ქართული ოცნება და უმაღლესი საარჩევნო კომისია შეთანხმებულად მოქმედებენ, დღევანდელი ფაქტი კი თავის დროზე, საუბნო კომისიის წევრების პარტიული კუთვნილების მიხედვით დაკომპექტების გაგრძელეებაა", — ამბობს ფირცხალაიშვილი.

ლელოს ბრალდების საპასუხოდ, ცესკოში განმარტავენ, რომ მე-10 და 53-ე საარჩევნო უბნები ბათუმის მე-3 საჯარო სკოლის უკანა ფლიგელშია განთავსებული და ის სააგიტაციო მასალა, რომელიც ლელოს წევრებმა აღმოაჩინეს, სკოლის დარაჯს ჰქონდა დალაგებული საკუთარ მაგიდაზე.

"საარჩევნო ადმინისტრაცია პასუხისმგებლობას ვერ აიღებს დარაჯის ქმედებაზე და ასევე, უნდა აღინიშნოს, რომ არანაირი შეხება საარჩევნო უბანს არ ჰქონია აღნიშნულ ფაქტთან", — განაცხადა ცესკოს პრესსპიკერმა, ანა მიქელაძემ.