2020 წლის 21 ოქტომბერს ევროპის საბჭოს მინისტრთა კომიტეტის სხდომაზე საკითხის ევროპის საბჭო და კონფლიქტი საქართველოში ფარგლებში მეშვიდე გადაწყვეტილება მიიღეს. აღნიშნულის შესახებ ინფორმაციას საგარეო საქმეთა სამინისტრო ავრცელებს.

მათი განცხადებით, 21 ოქტომბერს მიღებულ დოკუმენტში ევროპის საბჭოს წევრი ქვეყნების მხარდაჭერა საქართველოს სუვერენიტეტისა და ტერიტორიული მთლიანობის მიმართ მის საერთაშორისოდ აღიარებულ საქღვრებში კიდევ ერთხელ დაფიქსირდა. ასევე, ყურადღება გამახვილდა რუსეთის საერთაშორისო სამართლებრივ ვალდებულებებზე, როგორც ქვეყნისა, რომელიც ახორციელებს ეფექტურ კონტროლს საქართველოს ოკუპირებულ ტერიტორიებზე.

სამინისტროს ცნობით, დოკუმენტში ხაზგასმულია, რომ რუსეთის მიერ შექმნილი მუდმივი დაბრკოლებების, მათ შორის, ადგილზე რუსეთის სამხედრო ნაწილების ყოფნის გამო საქართველო ლეგიტიმურ იურისდიქციას საკუთარ რეგიონებში ვერ ახორციელებს. მათივე ინფორმაციით, მინისტრთა კომიტეტის მიერ მიღებულ გადაწყვეტილებაში ყურადღება გამახვილებულია რუსეთის აგრესიის შემდგომ 12 წლიან პერიოდზე და შეფასებულია რუსეთის ფედერაციის უკანონო ქმედებები, რაც ადგილზე ადამიანის უფლებებისა და ჰუმანიტარული კუთხით მძიმე მდგომარეობას ქმნის.

საგარეო საქმეთა სამინისტროს ცნობით, წინა გადაწყვეტილებების მსგავსად, წელსაც დაფიქსირებულია, რომ არსებული კონფლიქტი ევროპის საბჭოს ორ წევრ წვეყანას, რუსეთსა და საქართველოს შორის არის.

უწყების ინფორმაციით, გადაწყვეტილებაში ასევე აღნიშნულია, რომ რუსეთის მიერ განხორციელებული უკანონო ქმედებები, რეგიონში უსაფრთხოებისა და სტაბილურობის გამყარებისაკენ მიმართულ ძალისხმევას ხელს უშლის. რაშიც იგულისხმება, მათ შორის გახშირებული სამხედრო წვრთნები და შესაბამისი ინფრასტრუქტურის გაძლიერება, ე.წ. ხელშეკრულებების დადება, ცხინვალის რეგიონის სამხედრო დაჯგუფებების რუსეთის შეიარაღებული ძალების შემადგენლობასთან შერწყმა, ე.წ. ძალოვანი სტრუქტურების საინფორმაციო და საკოორდინაციო გაერთიანებული ცენტრების შექმნა, ე.წ. საბაჟო პუნქტების ფუნქციონირება, ადმინისტრაციული სასაზღვრო ხაზის გასწვრივ უკანონო ბარიერებისა და მავთულხლართების ინსტალაცია

მათივე ცნობით, დოკუმენტში აღნიშნულია, რომ რუსეთის მიერ ჩადენილ უკანონო ქმედებებს, რაც საქართველოს ორი რეგიონის სტატუსის შეცვლისკენ არის მიმართული, მათ შორის, ე.წ პასპორტის გაცემას და უცხოელი რეზიდენტების სტატუსის შემოღებას არავითარი სამართლებრივი ძალა არ გააჩნია.

მინისტრთა კომიტეტი გადაწყვეტილებაში დავით ბაშარულის, გიგა ოთხოზორიასა და არჩილ ტატუნაშვილის გარდაცვალების ფაქტებზე დაუსჯელობის გამო შეშფოთებას გამოთქვამს. ასევე, აფხაზეთის რეგიონში რუსეთის სამხედრო ბაზაზე საქართველოს მოქალაქის, ირაკლი კვარაცხელიას გაურკვეველ ვითარებაში გარდაცვალების გამო შეშფოთებას გამოთქვამს.

სამინისტროს ცნობით, გადაწყვეტილებაში გამოხატულია შეშფოთება საქართველოს ორივე რეგიონში ადამიანის უფლებების მდგომარეობის გაუარესების გამო. მათ შორის აღნიშნულია ეთნიკური წარმომავლობის ნიშნით ქართველების დისკრიმინაციის გახშირებული შემთხვევები, მათ მიმართ დამატებითი შეზღუდვების დაწესების გზით გაიარონ რეგისტრაცია უცხოელი რეზიდენტის სტატუსით ან შეიცვალონ სახელები და ეთნიკური იდენტობა.

უწყების ინფორმაციით, დოკუმენტი გმობს, აფხაზეთის რეგიონში გადაადგილების შეზღუდვებს და სამხრეთ ოსეთში გამშვები პუნქტების ხანგრძლივ დაკეტვას, რის გამოც უმძიმეს ჰუმანიტარულ ვითარებაში უწევს ცხოვრება ადგილობრივ მოსახლეობას.

სამინისტროს ცნობით, დოკუმენტი ასევე გმობს აფხაზეთის რეგიონში უკანონოდ მიღებულ გადაწყვეტილებას სიკვდილით დასჯის შემოღებასთან დაკავშირებით.

ევროპის საბჭოს მინისტრთა კომიტეტი რუსეთის ფედერაციას მოუწოდებს, უზრუნველყოს
ევროპის საბჭოს ადამიანის უფლებათა დაცვისა და მონიტორინგის ორგანოების დაუყოვნებლივი და შეუზღუდავი შესვლა საქართველოს მთავრობის კონტროლს მიღმა დარჩენილ ტერიტორიებზე.