თბილისის საქალაქო სასამართლოში ოცნების თავდაცვის მინისტრის ყოფილი მოადგილის, გიორგი ხაინდრავას, ამავე უწყების შესყიდვების დეპარტამენტის ყოფილი უფროსის, ვლადიმერ ღუდუშაურისა და ჯუანშერ ბურჭულაძის ცოლის ძმის, ვასილ მხეიძის სასამართლო პროცესი მიმდინარეობს. სხდომა დღეს, 29 ივლისს, 10:00 საათზე იყო ჩანიშნული.

IPN-ის ცნობით, სასამართლო პროცესზე მოსამართლე ირაკლი ხუსკივაძემ გიორგი ხაინდრავას ჰკითხა, იყო თუ არა მისთვის ბრალდების შინაარსი გასაგები, რის პასუხადაც ხაინდრავამ თქვა: "ბრალდების შინაარს გავეცანი, უბრალოდ არ ვეთანხმები".

სახელმწიფო ბრალდება ყველაზე მკაცრი აღკვეთის ღონისძიებას პატიმრობას ითხოვს. გიორგი ხაინდრავა და ვასილ მხეიძე ბრალს არ აღიარებენ, ვლადიმერ ღუდუშაური კი დუმილის უფლებას იყენებს.

შეგახსენებთ, გუშინ, 28 ივლისს, პროკურატურამ ბრალი წარუდგინა ოცნების თავდაცვის მინისტრის ყოფილ მოადგილეს, გიორგი ხაინდრავას, იმავე უწყების შესყიდვების დეპარტამენტის ყოფილ ხელმძღვანელს, ვლადიმერ ღუდუშაურს და ოცნების თავდაცვის იმდროინდელი მინისტრის ცოლის ძმას, ვასილ მხეიძეს. ღუდუშაურსა და გიორგი ხაინდრავას დიდი ოდენობით თანხის გაფლანგვას ედავებიან, ხოლო ვასილ მხეიძეს ხელშეწყობას.

"სახელმწიფო უსაფრთხოების სამსახურის ანტიკორუფციული სააგენტოს მიერ ჩატარებული გამოძიების შედეგად დადგინდა, რომ 2023 წელს საქართველოს თავდაცვის მინისტრის ყოფილმა მოადგილემ და საქართველოს თავდაცვის სამინისტროს შესყიდვების დეპარტამენტის იმდროინდელმა უფროსმა, საქართველოს თავდაცვის ყოფილი მინისტრის ნათესავის დახმარებით, საქართველოს თავდაცვის სამინისტროს მიერ სამხედრო ჰოსპიტლისთვის, მაგნიტურ-რეზონანსული ტომოგრაფის აპარატის შეძენის პროცესში მიზანმიმართული ქმედებებით შექმნეს არაკონკურენტული გარემო, რის შედეგადაც, არარეალური გარიგებების დადების გზით გაიზარდა აპარატის რეალური ღირებულება და 2 606 272 ლარად ღირებული მაგნიტურ-რეზონანსული ტომოგრაფის აპარატი საქართველოს თავდაცვის სამინისტროსთვის მიწოდებული იქნა 3 940 000 ლარად. დანაშაულებრივი ქმედებების შედეგად ბრალდებულებმა გაფლანგეს საქართველოს თავდაცვის სამინისტროს კუთვნილი 1 333 728 ლარი," — აღნიშნულია პროკურატურის განცხადებაში.

უწყების ცნობით, გამოძიება წინასწარი შეთანხმებით ჯგუფის მიერ, სამსახურებრივი მდგომარეობის გამოყენებით, საქართველოს თავდაცვის სამინისტროს კუთვნილი დიდი ოდენობით თანხის გაფლანგვის და გაფლანგვაში დახმარების ფაქტზე გრძელდება, საქართველოს სისხლის სამართლის კოდექსის 182-ე მუხლის მე-2 ნაწილის "ა", "დ" ქვეპუნქტებით და მე-3 ნაწილის "ბ" ქვეპუნქტით, რაც სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.

ასევე იხილეთ: