ძლიერმა წყალდიდობამ პეკინში სულ მცირე 30 ადამიანი იმსხვერპლა. ამის შესახებ ინფორმაციას Reuters ჩინურ მედიაზე დაყრდნობით ავრცელებს.

საინფორმაციო სააგენტო Xinhua-ს ცნობით, 80 000-ზე მეტი ადამიანი ევაკუირებულია, 136 სოფელს ელექტროენერგია გაეთიშა, დაზიანდა გზები და საკომუნიკაციო ხაზები. მაშველებმა მიონში დატბორილი მოხუცთა სახლებიდან 48 ადამიანი გამოიყვანეს. დაიხურა პარკები, მუზეუმები, საზოგადოებრივი ტრანსპორტი და გაუქმდა ასობით რეისი.

სი ძინპინმა მსხვერპლი და ზიანი პეკინში, ჰებეის, ჯილინისა და შანდუნის პროვინციებში დაადასტურა და მასშტაბური სამძებრო-სამაშველო ღონისძიებების ჩატარების ბრძანება გასცა.

წვიმა პეკინში, ჰებეისა და ტიანჯინში კვლავ გრძელდება. მოქალაქეები სოციალურ ქსელ Weibo-ზე ხელისუფლებას სამაშველო სამუშაოების დაჩქარებას სთხოვენ.