რეფორმერის თავმჯდომარე თორნიკე ჯანაშვილი და პარტიის ბათუმის მაჟორიტარი დეპუტატობის კანდიდატი ჯეირან ოქროპირიძე აჭარაში ამომრჩევლებთან შეხვედრებს განაგრძობენ, ადგილობრივების პრობლემები ისმენენ და მათი გადაჭრის გზებზე საუბრობენ.

თორნიკე ჯანაშვილი ადგილობრივ მოსახლეობას რეფორმერის საარჩევნო პროგრამასა და პარტიის სამომავლო გეგმებზე ესაუბრა. მან ბათუმელებს ქალაქისა და რეგიონის განვითარების პერსპექტივებზე რეფორმერის ხედვები გააცნო.

"რეფორმერი აგრძელებს მოსახლეობასთან შეხვედრებს აჭარაში. შეხვედრებზე მოქალაქეები გამოხატავენ წუხილს იმ პრობლემებზე, რაც მათ აქვთ და რაც, სამწუხაროდ, არ მოგვარდა ამ წლების განმავლობაში. აჭარას აქვს განვითარების დიდი პოტენციალი. ადგილობრივი მოსახლეობა არ კარგავს იმედს, რომ შეიცვლება არსებული გარემო. მათ აქვთ დიდი მოლოდინი ახალი სახეების მიმართ და გამოხატავენ ინტერსს. ისინი აქტიურად ერთვებიან შეხვედრებში, პროცესებში. დარწმუნებული ვარ, 31 ოქტომბერს გააკეთებენ სწორ არჩევანს. მათ აქვთ რწმენა, რომ ჩვენ ერთად შევცვლით არსებულ გარემოს და შევქმნით ჩვენი ქვეყნის უკეთეს მომავალს", — განაცხადა ჯანაშვილმა.

ამომრჩევლებთან შეხვედრები Covid 19-ის დადგენილი რეგულაციებით და ნორმების დაცვით ჩატარდა.