კორონავირუსით ინფიცირებულ წილოსანთან კონტაქტში მყოფი გახარია განმარტავს, რატომ არ არის თვითიზოლაციაში. 16 ოქტომბერს ქართული ოცნება გურიაში იმყოფებოდა. მათ ოზურგეთის, ლანჩხუთისა და ჩოხატაურის მაჟორიტარი დეპუტატობის კანდიდატი წარადგინეს. წარდგენაზე იმყოფებოდა პარტიის წევრი, ნინო წილოსანიც. დღეს, 19 ოქტომბერს ცნობილი გახდა, რომ მას კორონავირუსი დაუდასტურდა.

დღეს, საკოორდინაციო საბჭოს სხდომის შემდეგ, პრემიერმინისტრ გიორგი გახარიას ჟურნალისტებმა ჰკითხეს — რატომ არ გადავიდნენ თვითიზოლაციაში მთავრობის ის წევრები, რომლებიც იმყოფებოდნენ გურიაში, მაშინ, როცა იქ მყოფ ნინო წილოსანს კორონავირუსი დაუდასტურდა.

მიუხედავად იმისა, რომ პრემიერს პირდაპირ არ უთქვამს, რატომ არ არის იგი თვითიზოლაციაში, მან მიანიშნა, გამომდინარე იქიდან, ის "სხვებისგან განსხვავებით" წესებს იცავს და არ იხსნის პირბადეს, დაინფიცირების რისკი, კონტაქტის მიუხედავად, მინიმალური იყო.

"კოლეგებო, მე წესებს ვიცავ და, როდესაც ჩემს მოქალაქეებთან ვსაუბრობ, არ აქვს მნიშვნელობა ეს პოლიტიკური კამპანიაა საარჩევნო თუ სხვა სახით, პირბადეს ვატარებ ყოველთვის. შეიძლება ჩვენ ყველაზე მეტად ვიყოთ ინფიცირების გადაცემის რისკი, რადგან ბევრს ვმოძრაობთ ქვეყანაში, ამიტომ ეს ის პასუხისმგებლობაა, რომელსაც ჩვენ ვგრძნობთ და პირბადეს არ ვიხსნით. შესაბამისად, მიუხედავად იმისა, რომ რისკი იყო მინიმალური, რადგან არცერთს პირბადე არ მოგვიხსნია, კიდევ ერთხელ გადავიზღვიეთ თავი, კიდევ ერთხელ დავიტესტეთ",— აღნიშნა გახარიამ.

იგივე კითხვა გახარიას მეორედ დაუსვეს. ამჯერად, პრემიერმინისტრმა განაცხადა, მათი კამპანიის ფარგლებში ყველას ეკეთა პირბადე, მათ შორის, ნინო წილოსანსაც. ამიტომ, გახარიას განმარტებით, მათი დაცულობის ხარისხი "ძალზედ მაღალია" და იგი მხოლოდ ტესტის გაკეთებით შემოიფარგლა.

"წილოსანთან დაკავშირებით, არ ვიცი ცხოვრების რა ნაწილზე საუბრობდა, რომ პირბადე ეკეთა, მაგრამ საარჩევნო კამპანიის პირობებში, როდესაც ჩვენ გქვონდა ერთობლივი მონაწილეობის შესაძლებლობა ამ კამპანიაში, ყველას ეკეთეა პირბადე, მათ შორის მასაც. შესაბამისად, ლოგიკურია, ვთქვათ, რომ ჩვენი დაცულობის ხარისხი იყო ძალზედ მაღალი, უმაღლესი. მაგრამ იმ პასუხისმგებლობიდან გამომდინარე, რომელიც მაქვს ჩემს თანამშრომლებთან, რომლებთანაც გუშინაც მქონდა [კონტაქტი], როდესაც დავბრუნდი დასავლეთ საქართველოდან და დღესაც, მე მაინც წავედი და ტესტი გავიკეთე, რომელიც იყო უარყოფითი. ახლა თქვენ რა გინდათ? პირბადე მიკეთია ყოველთვის, ტესტიც დამატებით გავიკეთე, თვითიზოლაციაში გადავიდე და რა ვქნა? აქ ჩემს მაგივრად ვინ იმუშავებს, იქნებ იდეა შემომთავაზოთ?", — განაცხადა გახარიამ.

2 ოქტომბერს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა, რომ ძალაში შევიდოდა განკარგულება, რომლის მიხედვითაც ინფიცირებულთან კონტაქტში მყოფი პირი ყოველგვარი ტესტირების გარეშე გადადის თვითიზოლაციაში. გამყრელიძის თქმით, იმ შემთხვევაში თუ ინფიცირებულთან კონტაქტის მქონე პირებმა სიმპტომები არ გამოავლინეს, 12 დღის შემდეგ ისინი, ასევე ტესტირების გარეშე, იზოლაციისგან თავისუფლდებიან. აღნიშნული განკარგულება 7 ოქტომბერს შევიდა ძალაში.