ევროპული საქართველოს საარჩევნო შტაბის ხელმძღვანელი, სერგი კაპანაძე, გრიგოლ ვაშაძის განცხადებას აფასებს იმის შესახებ, რომ ტელეკომპანია იმედი უნდა დაიხუროს.

კაპანაძის თქმით, ყველაზე აღვირახსნილ, საბჭოურ პროპაგანდსიტულ ტელეკომპანიასაც კი აქვს არსებობის უფლება დემოკრატიულ ქვეყანაში.

"ჩვენ, ევროპულ საქართველოში, მიგვაჩნია, რომ მათ შორის ყველაზე აღვირახსნილი პროპაგანდის წარმომადგენელ მედიასაშუალებებსაც აქვთ არსებობის უფლება. აღვირახსნილში იგულისხმება, როდესაც პირდაპირ სამთავრობო მესიჯბოქსით საუბრობენ და მხოლოდ მთავრობის პროპაგანდით არიან დაკავებულები, რაც ვნახეთ ასევე ბატონი ლალიაშვილის ჩანაწერში, რაც ისედაც ნათელია, საკმარისია ჩართო იმედი, ნახავ, რომ ჩვეულებრივი სამთავრობო, საინფორმაციო სააგენტოა.

ჩვენ მიგვაჩნია, განსხვავებით ბატონი ვაშაძისაგან, რომ მათ შორის ყველაზე აღვირახსნილ პროპაგანდას აქვს არსებობის უფლება. ამიტომ, რა თქმა უნდა, დასახური არ არის. ეს არის ჩვეულებრივი აღვირახსნილი პროპაგანდისტული სამთავრობო მანქანა და მას თავისი სახელი უნდა ეწოდოს. ამიტომ, ჩვენთვის არანაირი პორბლემა არ არის ასეთი ტიპის მედიასაშუალების არსებობა. ოღონდ, რა თქმა უნდა, ვიტოვებთ უფლებას, რომ ყოველთვის, როდესაც ცალმხრივად არის გაშუქებული ესა თუ ის მოვლენა, როდესაც მხოლოდ ერთი მხარე მიდის და საუბრობს მეორე მხარის დემონიზებაზე და იქ კონტრარგუმენტები არ ისმის, როდესაც ყველაზე ურცხვად იმეორებენ ყველაზე ურცხვ ტყუილებს მთავრობის, ჩვენ მიგვაჩნია, რომ ჩვენ გვაქვს პასუხისმგებლობა ამაზე ვისაუბროთ ხმამაღლა.

ამიტომ, ყველაზე საბჭოური პროპაგანდისტული ტეკლეკომპანიაც, როგორიც არის იმედი, ჩვეულებრივად უნდა არსებობდეს. დახურვა, რა თქმა უდნა, არის სრულიად მიუღებელი. დემოკრატიულ ქვეყნებში, მათ შორის პორპაგანდისტული საშუალებებიც ჩვეულებრივად არსებობს და ეს არის ძალიან მნიშვნელოვანი სიტყვის თავისუფლებისთვის", — განაცხადა კაპანაძემ.