ბერლინში გადაწყვიტეს, უარი თქვან თავაზიან გზავნილებზე და იმ ხალხს, ვინც პირბადეს არ ატარებს, შუა თითი აჩვენონ — ასე პირდაპირ შეახსენონ ის წესები, რომლის დაცვაც ყველას ევალება.

The Guardian-ის ინფორმაციით, ეს ახალი რეკლამა საჯარო ინფორმაციის გავრცელების კამპანიის ნაწილია, რომელიც ბერლინის სენატის დაკვეთით განხორციელდა და ეს რეკლამაც სწორედ მათი გადაწყვეტილებით გამოჩნდა ადგილობრივ გაზეთებში.

სარეკლამო პოსტერზე ასაკოვანი ქალია გამოსახული, რომელიც პირბადითა და აწეული შუა თითით პირდაპირ მკითხველს უყურებს. "ეს თითი ყველას, ვინც პირბადეს არ ატარებს: ჩვენ წესებს უნდა ვიცავდეთ" — ვკითხულობთ პოსტერზე.

ფოტო: Visit Berlin

"გვინდოდა, ის ენა გამოგვეყენებინა, რომელიც ბერლინის ხასიათს შეეფერება და თან გვეჩვენებინა პანდემიისგან გამოწვეული დრამატული მდგომარეობის სიმწვავე, რაც გამოგვივიდა კიდეც", — აცხადებს სარეკლამო კომპანია Visit Berlin-ის წარმომადგენელი.

ისინი, ვინც ამ რეკლამაზე მუშაობდნენ, აღნიშნავენ, რომ მათ ბერლინური განწყობის გადმოცემა სცადეს: უხეში, მაგრამ თან გულიანი.

"ბერლინელებისა და ჩვენი ქალაქის სტუმრების უმეტესობა ითვალისწინებს და იცავს კიდეც მიღებულ წესებს, თუმცა არიან ვიღაცები, ვინც ამას არ აკეთებენ. ეს ადამიანები განსაკუთრებულ საფრთხეს უქმნიან მოხუც და სხვა მაღალი რისკის მქონე ჯგუფებს. სწორედ ამიტომაც გვინდოდა, ყურადღების განსაკუთრებულად მიპყრობა ამ საკითხზე და მსგავსი გზაც ამის გამო ავირჩიეთ", — აღნიშნავენ პოსტერის იდეის ავტორები BBC-ისთან.

მიუხედავად ამისა, პოსტერით, ცხადია, ყველა ვერ მოიხიბლა.

ანგელა მერკელის ქრისტიან-დემოკრატიული კავშირის წარმომადგენელმა ბერლინში ამ გადაწყვეტილების გამო გააკრიტიკა ქალაქის სენატი, რომელსაც უმეტესად მემარცხენე და მწვანეთა პარტია მართავს:

"სიტუაცია მეტისმეტად სერიოზულია, რომ სულელური ხუმრობების დრო გვქონდეს", — განაცხადა კაი ვეგნერმა.

კიდევ ერთი პარტიის, თავისუფალი დემოკრატების წევრმა კი აღნიშნა, რომ "კამპანია არც სასაცილო ან კრეატიული გამოვიდა, არამედ უფრო თავხედური და შეურაცხმყოფელია".

ადგილობრივი გაზეთის Tagesspiegel განცხადებით კი, შესაძლოა, კამპანიამ უკვე თავის მიზანსაც კი მიაღწია: "მრავალჯერ გამეორების ნაცვლად ასე გაგება უფრო მარტივია".