ევროპული საქართველოს საარჩევნო შტაბის ხელმძღვანელი, სერგი კაპანაძე, დავით გარეჯის საქმეზე, მიხეილ სააკაშვილისათვის შესაძლო ბრალის წაყენებას ეხმაურება.

"რა თქმა უნდა, კარტოგრაფების საქმის მთავარი ამოცანა ივანიშვილისთვის იყო, რომ მორიგჯერ რაღაც სისულელე დაებრალებინა წინა ხელისუფლებისათვის და მორიგჯერ გამოეგორებინა სააკაშვილი, როგორც საფრთხობელა. ეს არის ამ საქმის მთელი არსი", — აღნიშნავს კაპანაძე.

კაპანაძის თქმით, მაშინ როდესაც ხელისუფლებამ ვერცერთ გამოწვევას ვერ უპასუხა და ყველაში ჩაფლავდა მას ერთადერთ შანსად წინა ხელისუფლების მიმართ ისრებისა და ტალახის სროლა დარჩა.

"რა თქმა უნდა, საერთოდ არ გამიკვირდება რომ ბრალს წაუყენებენ და საერთოდ არ გამიკვირდება, თუ ეს ნეგატიური პროპაგანდისტული ნიაღვარი კიდევ ერთხელ იქნება მიმართული მესამე პრეზიდენტის წინააღმდეგ. ივანიშვილს მხოლოდ ეს შანსი დარჩა ახლა. როცა კორონა გაექცა, როდესაც აღმოჩნდა, რომ არის ჩაფლავებული მთავრობა, როდესაც აღმოჩნდა, რომ ვერცერთ გამოწვევას თავს ვერ ართმევენ და ყველა პრობლემაზე პასუხი აქვთ, რომ არ იციან რას იზამენ. ერთადერთი გამოსავალი აქვთ, რომ ისევე რაღაც დააბრალონ სააკაშვილს და კარგად უნდა ესმოდეს ყველას, რომ ეს ხრიკები მას მეტი აღარ გაუვა და აუცილებლად მოხდება გარდამტეხი ცვლილებები, მას მერე რაც ივანიშვილი დამარცხდება ამ არჩევნებში. ეს არის გარდაუვალი და ვერცერთი მსგავსი ნიაღვარი ტალახის სროლის ივანიშვილს ვეღარც უშველის", — განაცხადა კაპანაძემ.