ევროკავშირმა ოპოზიციონერი ალექსეი ნავალნის მოწამვლის გამო რუს მაღალჩინოსნებსა და ერთ კვლევით ინსტიტუტს სანქციები დაუწესა. სანქციების სიაში მოხვდნენ:

  • უსაფრთხოების ფედერალური სამსახურის დირექტორი ალექსანდრ ბორტნიკოვი;
  • რუსეთის პრეზიდენტის შიდა პოლიტიკის სამსახურის ხელმძღვანელი, ანდრეი იარინი;
  • პრეზიდენტის ადმინისტრაციის ხელმძღვანელის პირველი მოადგილე, სერგეი კირიენკო;
  • თავდაცვის მინისტრის მოადგილეები ალექსეი კრივორუჩკო და პაველ პოპოვი;
  • პრეზიდენტის წარმომადგენელი ციმბირის ოლქში, სერგეი მენიალო;
  • ორგანული ქიმიისა და ტექნოლოგიების სახელმწიფო კვლევითი ორგანიზაცია.

ევროკავშირის სანქციები მათ ტერიტორიაზე მოგზაურობის შეზღუდვასა და აქტივების გაყინვას ითვალისწინებს. როგორც გაერთიანების განცხადებაშია აღნიშნული, ნავალნის მოწამვლა შესაძლოა პრეზიდენტის ადმინისტრაციის თანხმობითა და უსაფრთხოების სამსახურისა და ადგილობრივი მაღალჩინოსნების მხარდაჭერით მომხდარიყო. თავდაცვის სამინისტროს თანამშრომლები სიაში მოხვდნენ, რადგან აღნიშნული უწყება "ნოვიჩოკის" ტიპის მომწამვლელი ნივთიერების განადგურებაზე იყო პასუხისმგებელი.

რუსეთისთვის სანქციების დაწესებაზე ბოლო რამდენიმე კვირა აქტიურად საუბრობენ. აღნიშნული საკითხი საფრანგეთმა და გერმანიამ წამოჭრა და 12 ოქტომბერს ლუქსემბურგში ევროკავშირის წევრი ქვეყნების საგარეო საქმეთა მინისტრებმა განიხილეს. ამასთან, რუსეთში ამბობენ, რომ ევროკავშირის სანქციებს სარკისებურად უპასუხებენ.

20 აგვისტოს ალექსეი ნავალნი თვითმფრინავში შეუძლოდ გახდა, რის შემდეგაც ის ომსკის საავადმყოფოში გადაიყვანეს. ორი დღის შემდეგ ოჯახის მოთხოვნით, ოპოზიციონერი ბერლინის კლინიკა შარიტეში წაიყვანეს. გერმანელი ექიმები მივიდნენ დასკვნამდე, რომ ნავალნი "ნოვიჩოკის" ჯგუფის ქიმიური ნივთიერებით მოწამლეს. იგივე საფრანგეთისა და შვეიცარიის ლაბორატორიებმა დაადასტურეს.

რუსეთის ხელისუფლება აცხადებს, რომ მომხდართან კავშირი არ აქვთ, ნავალნის მოწამვლის ვერსიას უარყოფენ და გერმანიისგან უფრო მეტი ინფორმაციის მიწოდებას მოითხოვენ.

ამავე თემაზე: