პუტინის ვერსიის საპასუხოდ, რომლის თანახმადაც, შესაძლოა, ნავალნიმ თავი თავად მოიწამლა, ნავალნიმ ინსტაგრამგვერდზე პოსტი გამოქვეყნა და თქვა, რომ კარგი ვერსიაა და შესწავლას იმსახურებს.

"სამზარეულოში ნოვიჩოკი მოვხარშე; მერე თვითმფრინავში მშვიდად ვწრუპავდი; ბოლოს კომაში ჩავვარდი. მანამდე კი ცოლს, კოლეგებსა და მეგობრებს მოველაპარაკე, რომ თუ ჯანდაცვის სამინსიტრო გერმანიაში ჩემს გადაყვანას მოინდომებს, არაფრის დიდებით არ დათანხმდნენ. მოვკმვდარიყავი ომსკის საავადმყოფოში და აღმოვჩენილიყავი ომსკის მორგში, სადაც სიკვდილის მიზეზად ჩაწერილი იქნებოდა, "საკმარისი იცხოვრა" — აი, ეს იყო ჩემი ეშმაკური გეგმის საბოლოო მიზანი. მაგრამ პუტინმა მაჯობა, მას ასე იოლად ვერ მოატყუებ. შედეგად კი, მე, როგორც სულელი, 18 დღე კომაში ვიყავი. ჩემსას ვერ მივაღწიე. პროვოკაცია არ გამოვიდა!" — ნათქვამია ნავალნის საპასუხო პოსტში.

ნავალნის მიერ თავის მოწამვლის ვერსიაზე პუტინმა საფრანგეთის პრეზიდენტ მაკრონთან სატელეფონო საუბრისას განაცხადა. ინფორმაცია ამის შესახებ გამოცემა MEDUZA-მ ფრანგულ მედია LE MONDE-ზე დაყრდნობით გაავრცელა. მათივე ცნობით, საუბრისას მაკრონმა უარყო პუტინის ვერსია.

მედიის ინფორმაციით, საუბრისას პუტინმა ნავალნის მარტივი არეულობის გამომწვევი უწოდა და აღნიშნა, რომ კორუფციასთან ბრძოლის ფონდი, რომელიც ოპოზიციის წარმომადგენლებითაა დაკომპლექტებული, დეპუტატებსა და ჩინოვნიკებს აშანტაჟებდა.

20 აგვისტოს ალექსეი ნავალნი ტომსკი-მოსკოვის თვითმფრინავში შეუძლოდ გახდა და გონება დაკარგა, რის შემდეგაც თვითმფრინავი ომსკში დაეშვა და პოლიტიკოსი საავადმყოფოში გადაიყვანეს.

ნავალნის ახლობლები ითხოვდნენ, რომ იგი სამკურნალოდ უცხოეთში გადაეყვანათ. რუსი ექიმები კი აცხადებდნენ, რომ მძიმე მდგომარეობაში მისი გადაყვანა საშიში იქნებოდა. თუმცა 22 აგვისტოს პოლიტიკოსი გერმანიაში გადაიყვანეს.

სექტემბრის დასაწყისში გერმანიის მთავრობამ განაცხადა, რომ ნავალნი "ნოვიჩოკის" ჯგუფის საწამლავით მოწამლეს. რუსულმა მხარემ მოწამვლასთან ყველანაირი კავშირი უარყო და განაცხადა, რომ ომსკის კლინიკაში გაკეთებულ ანალიზში საწამლავის კვალი არ ჩანდა.

ალექსეი ნავალნი პუტინის ყველაზე დიდი ოპოზიციონერია. პოლიტიკური აქტიურობის გამო ის მოსკოვში არაერთხელ დააკავეს და ადმინისტრაციული პატიმრობაც მიუსაჯეს. პირველ ჯერზე საპატიმრო დაწესებულებაში მან ათი დღე გაატარა.