საპარლამენტო პარტია პატრიოტთა ალიანსის ლიდერი და პარლამენტის ვიცე-სპიკერი ირმა ინაშვილი New Studios მიერ გადაღებულ რეკლამას ფეისბუკზე ეხმაურება და აცხადებს, რომ ის შეურაცხყოფას აყენებს ეროვნულ ტრადიციებს:

"კლიპი ე.წ. ბოროტ თოვლის ბაბუაზე, რომელიც კეთილ სანტას ფიზიკურად უსწორდება, შეურაცხყოფას აყენებს არა მარტო ჩვენს ეროვნულ ტრადიციებს, არამედ მავნე ზემოქმედებას ახდენს ადამიანთა (ბავშვების) ცნობიერებაზე და ღია პროპაგანდას უწევს ძალადობას. მიზანმიმართულად აღვივებს ნეგატიურ განწყობას ჩვენი ეროვნული პერსონაჟის - თოვლის ბაბუის მიმართ".

ინაშვილის ინფორმაციით, New Studio-ს სარეკლამო კლიპების დამკვეთთა შორის სახელმწიფო სტრუქტურებიც არიან, ამიტომ ის მათაც მიმართავს, შეუწყვიტონ დაფინანსება აღნიშნულ კომპანიას.

პატრიოტთა ალიანსის ლიდერი შინაგან საქმეთა სამინისტროს კიბერდანაშაულის წინააღმდეგ ბრძოლის სამმართველოსგან რეაგირებას და რეკლამის ინტერნეტსივრციდან მოხსნას ითხოვს.

New Studio-სგან თოვლის ბაბუაზე რეკლამის გავრცელების შეწყვეტას ითხოვს სახალხო დამცველი უჩა ნანუაშვილიც.