საქართველოს სახალხო დამცველი უჩა ნანუაშვილი სარეკლამო რგოლის, სანტას თოვლის ბაბუამ წაასწრო, დამამზადებელ New Studio-ს მიმართავს, შეწყვიტოს რეკლამის გავრცელება. ნანუაშვილი კომპანიისგან ითხოვს, მომავალში განსაკუთრებული გულისხმიერება გამოიჩინოს ბავშვის უფლებების დაცვის მიმართ.

ომბუდსმენი მიიჩნევს, რომ ინტერნეტით გავრცელებული ვიდეო რგოლი, სადაც ქართველი თოვლის ბაბუა სანტა კლაუსს კლავს, მავნე ზეგავლენას ახდენს როგორც მასში მონაწილე ბავშვზე, ასევე სხვა არასრულწლოვნებზე და აცხადებს, რომ მიუხედავად ვიდეოზე აღნიშნული ასაკობრივი შეზღუდვისა, მათ თავისუფლად მიუწვდებათ ხელი ამ ვიდეო რგოლზე:

"რეკლამის შესახებ საქართველოს კანონის თანახმად, აკრძალულია არასრულწლოვანთა გულუბრყვილობისა და გამოუცდელობის ბოროტად გამოყენება და რეკლამაში ისეთი ტექსტის, აუდიო და ვიდეო–ინფორმაციის მოთავსება, რომელიც არასრულწლოვანს საშიშ ადგილასა და ვითარებაში აჩვენებს".

ომბუდსმენის თქმით, გაეროს ბავშვის უფლებების კომიტეტი ერთმნიშვნელოვნად აღნიშნავს, რომ არასრულწლოვანი დაცული უნდა იყოს ტექნოლოგიური საშუალებებით ისეთი ინფორმაციის მიღებისგან, რომლის შედეგადაც შესაძლოა იგი აგრესიული, ძალადობრივი რეკლამის ზეგავლენის ქვეშ მოექცეს.

"სარეკლამო რგოლის დასაწყისში წარმოჩენილია საახალწლო ინტერიერი, რაც თავისთავად იქცევს ბავშვის ყურადღებას. შემდეგ კი ნაჩვენებია ძალადობრივი სცენა, რომელსაც ბავშვიც ესწრება. არსებობს საფრთხე, რომ არასრულწლოვნები არასათანადოდ აღიქვამენ რეკლამის სიუჟეტს, რამაც შესაძლოა მათ განვითარებაზე უარყოფითი გავლენა მოახდინოს" - აცხადებს უჩა ნანუაშვილი.

სახალხო დამცველი აღნიშნავს, რომ რეკლამაში, რომელშიც მონაწილეობს ბავშვი, ან რომელიც მიმართულია არასრულწლოვან აუდიტორიაზე, სასიცოცხლოდ მნიშვნელოვანია, ბავშვის საუკეთესო ინტერესის გათვალისწინება.